Qozog‘iston va Yevropa Ittifoqi $12 milliardlik kelishuvlarga erishdi

Qozog‘iston prezidenti Qosim-Jomart Toqayev Yevropa Ittifoqi bilan 12 milliard dollarlik tijoriy kelishuvlar imzoladi. Bu haqda Tengrinews nashri xabar berdi.

Qosim-Jomart Toqayev 22-iyun kuni rasmiy tashrif bilan Bryusselga kelgan edi. Ertasi kuni Yevropa kengashi Prezidenti Antoniu Koshta va Yevropa komissiyasi Prezidenti Ursula fon der Lyayen bilan muzokara o‘tkazdi.

Davlat rahbari yangi kelishuvlar haqida “Qozog‘iston–Yevropa Ittifoqi” davra suhbati chog‘ida ma’lum qildi.

“O‘tgan yili mamlakatimiz iqtisodiyoti 6,5 foizga o‘sdi, bu Xalqaro valyuta jamg‘armasi (XVJ) bashorat qilgan jahon iqtisodiyoti o‘sish sur’atidan ikki baravar yuqoridir. Yalpi ichki mahsulotimiz 305 milliard dollardan oshdi, aholi jon boshiga YaIM esa 15 ming dollarni tashkil qildi. XVJ prognozlariga ko‘ra, joriy yilda mamlakat iqtisodiyoti 360 milliard dollarga yetadi. Bugungi kunda kichik va o‘rta tadbirkorlik iqtisodiyotimizning qariyb 40 foizini tashkil etib, asosiy kapitalga kiritiladigan investitsiyalarning deyarli 70 foizini ta’minlamoqda", — dedi Toqayev.

Prezidentning aytishicha, Qozog‘istonda yanada shaffof, raqobatbardosh va sarmoyadorlar uchun jozibador iqtisodiyotni barpo etishga qaratilgan keng ko‘lamli siyosiy va iqtisodiy modernizatsiya jarayoni ketmoqda.

Shuningdek, Toqayev Qozog‘istonda xalqaro investorlar uchun keng ko‘lamli soliq va migratsiya imtiyozlarini taqdim etuvchi “Oltin viza” dasturi kabi yangi rag‘batlantiruvchi choralar joriy etilayotganini ta’kidladi.