Қозоғистонда 25 сентябрь — миллий мотам куни деб эълон қилинди

Қозоғистон президенти Қосим-Жўмарт Тўқаев Мангистау вилоятида ҳарбий хизматчилар ҳалок бўлгани муносабати билан 2026 йил 25 сентябрни мамлакатда умуммиллий мотам куни деб белгилади. Бу ҳақда давлат раҳбарининг тегишли фармойиши асосида хабар берилди.

Каспий денгизида 12 ҳарбий ҳалок бўлди

Фожиа 24 сентябрь куни Мангистау вилоятида Қозоғистон Ҳарбий-денгиз кучларининг машғулотлари вақтида юз берган.
Расмий маълумотларга кўра, Каспий денгизи соҳилида ўқув-жанговар вазифани бажариш жараёнида об-ҳаво шароити кескин ёмонлашиб, шамол кучайган. Дастлаб 19 нафар ҳарбий хизматчи денгизга оқиб кетгани хабар қилинган. 
Кейинчалик Мангистау вилояти ҳокимлиги маълумотни аниқлаштириб, 17 нафар ҳарбий хизматчи денгизга оқиб кетганини билдирди.

Сўнгги маълумотларга кўра, 12 нафар ҳарбий ҳалок бўлган, 3 нафари қутқарилган. Қолган икки нафар ҳарбийни қидириш ишлари олиб борилган. Қутқарилган ҳарбийлардан бири шифохонага ётқизилган.
Қозоғистон Мудофаа вазирлиги ҳалок бўлган 12 нафар ҳарбий хизматчининг исмларини ҳам эълон қилди. Рўйхатда 11 нафар матрос ва бир нафар офицер бор.

Жиноят иши қўзғатилди

Ҳодиса юзасидан Қозоғистон Бош прокуратураси томонидан жиноий иш қўзғатилган. Ҳодиса жойида ички ишлар, фавқулодда вазиятлар ва прокуратура ходимларидан иборат тезкор-тергов гуруҳи иш олиб бормоқда. Керакли экспертизалар тайинланган.

Шунингдек, ҳукумат томонидан фожиа сабабларини аниқлаш учун махсус комиссия тузилган. Комиссияга Бош вазир ўринбосари Қанат Бозумбаев раҳбарлик қилмоқда. У воқеа жойига бориб, тергов ва ҳалок бўлган ҳарбийларнинг оилаларига ёрдам кўрсатиш ишларини мувофиқлаштирган.

Тергов доирасида Қозоғистон Жиноят кодексининг 453-моддаси 2-қисми — хизматга бепарво муносабатда бўлиб, оғир оқибатларга олиб келиш, шунингдек, 465-модда — кема бошқариш қоидаларини бузиш билан боғлиқ жиноят ишлари бўйича ҳаракатлар бошлангани хабар қилинди.

Оқтовдаги байрам тадбирлари бекор қилинди

Фожиа муносабати билан Оқтов шаҳрида 25 сентябрга режалаштирилган «Шаҳар куни» тадбирлари бекор қилинди.
Умуммиллий мотам куни муносабати билан мамлакат бўйлаб давлат байроқлари туширилди, кўнгилочар тадбирлар бекор қилинди ёки бошқа муддатга кўчирилди. Телевидение ва радиоларда кўнгилочар дастурлар ўрнига ахборот ва махсус дастурлар эфирга узатилмоқда.

Президент Қосим-Жўмарт Тўқаев ҳалок бўлган ҳарбийларнинг оила аъзолари ва яқинларига таъзия билдирди ҳамда фожиа сабабларини ҳар томонлама аниқлаш ва жабрланган оилаларга ёрдам кўрсатиш бўйича топшириқ берди.

Муаллиф: Ҳасанбой ОЧУН