Gemini киберхавфсизлик синовида учта компания тизимига кирди

Google’нинг Gemini сунъий интеллект модели киберхавфсизлик имкониятларини синаш жараёнида интернетга чиқиб, учта компаниянинг тизимига кирган. Бу Google сунъий интеллект тизимининг бундай ҳаракатни мустақил амалга оширгани маълум бўлган биринчи ҳолат сифатида қайд этилмоқда.

Ҳодиса 2026 йил май ойида сунъий интеллект моделларини киберхавфсизлик бўйича баҳолайдиган Irregular компанияси ўтказган тест давомида содир бўлган.
Google’нинг хавфсизлик муҳандислиги бўйича вице-президенти Ҳизер Адкинснинг маълум қилишича, тест вақтида Gemini интернетдаги очиқ маълумотларни топган ва синов доирасидаги сайтлар деб ўйлаган учта веб-сайтга кириш учун аутентификация маълумотларини тахмин қилган.

Маълум бўлишича, тест сценарийсида Gemini сохта компания тизимида ахборот излаши керак бўлган. Бироқ синов жараёнида моделга интернетга кириш имконияти кутилмаганда очилиб қолган. Натижада у реал компанияларга тегишли тизимларга етиб борган.

Ҳолатларнинг бирида Gemini ҳимояланган тизимга кириш имконини берувчи паролни топгунча турли вариантларни тахмин қилган. Қолган икки ҳолатда эса модель очиқ репозиторийда жойлаштирилган маълумотлар орқали ҳимояланган тизимларга кириш имконини берувчи реквизитларни топган.

Google маълум қилишича, Gemini учала ҳолатда ҳам ҳақиқий компания тизимига кирганини англаганидан сўнг ҳаракатларини тўхтатган. Компания таъсирланган учта ташкилотни воқеадан хабардор қилган ва Irregular билан тест жараёнидаги хавфсизлик чораларини такомиллаштириш бўйича ишлаган.

Irregular вакили воқеа бошқа сунъий интеллект лабораторияларида кузатилган ҳолатларга ўхшаш муаммо билан боғлиқ бўлганини маълум қилди. Унинг айтишича, тегишли лабораториялар 2026 йил июль ойининг охирида хабардор қилинган ва компаниядаги маълум муаммолар бартараф этилган.

Шунга ўхшаш ҳолатлар аввал Meta, Anthropic ва OpenAI сунъий интеллект тизимларини синаш жараёнларида ҳам қайд этилган. Бу воқеалар сунъий интеллект агентларига интернет ва компьютер тизимларига кўпроқ мустақил кириш имконияти берилаётган бир пайтда хавфсизлик чораларини кучайтириш зарурлиги ҳақида саволларни кучайтирмоқда.

Google ва Irregular маълумотларига кўра, мазкур ҳодисаларда компанияларга зарар етказилмаган. Google эса Gemini’нинг ҳар уч ҳолатда ҳам ҳақиқий тизимга кирганини англаши билан ҳаракатни тўхтатганини таъкидлаган.

Муаллиф: Ҳасанбой ОЧУН