Судандаги ҳужумларда 27 киши ҳалок бўлди — шифокорлар

Бу ҳақда Sudan Doctors Network маълум қилди, деб хабар берди Al Jazeera.

Ташкилот маълумотига кўра, ҳужумлар Қардуд ва Абу Ҳамама ҳудудларида содир бўлган. Бу жойларда Оторо қабиласи вакиллари истиқомат қилади.

Sudan Doctors Network ҳужумларни Судан Халқ-Озодлик Ҳаракати — SPLM-N жангарилари амалга оширганини билдирди. Ташкилотга кўра, ҳужумлар оқибатида аҳолининг катта қисми Абу Ҳитан ва Кадугли ҳудудларига кўчишга мажбур бўлган.

Ташкилот тинч аҳолига этник асосда ҳужум қилиш халқаро гуманитар ҳуқуқнинг жиддий бузилиши эканини таъкидлади. Шунингдек, Жанубий Кордофандаги можаро кенг кўламли этник низога айланиши мумкинлигидан огоҳлантирди.

Маълумотларга кўра, сўнгги ҳужумлардан олдин ҳам SPLM-Nга алоқадор кучлар ва Оторо қабиласи ўртасида оғир тўқнашувлар содир бўлган. Низонинг илк сабабларидан бири ер масалалари билан боғлиқ келишмовчиликлар бўлган.

Судандаги уруш давом этмоқда

Судандаги фуқаролик уруши 2023 йил апрель ойида мамлакат армияси ва Тезкор қўллаб-қувватлаш кучлари (RSF) ўртасида бошланган. Жанубий Кордофандаги янги тўқнашувлар мамлакатдаги мавжуд гуманитар инқирозни янада оғирлаштирмоқда.

Судан Халқ-Озодлик Ҳаракатининг ажралиб чиққан қаноти бўлиб, уни Абдель Азиз ал-Ҳилу бошқаради. Унинг кучлари RSF билан иттифоқ тузган ва RSF бошчилигидаги параллел ҳукумат таркибига қўшилган.

Sudan Doctors Network халқаро ҳамжамиятни SPLM-N раҳбариятига босим ўтказиб, тинч аҳолига қарши ҳужумларни тўхтатишга чақирди. Ташкилот маълумотида сўнгги ҳужумларда аёллар ҳам жароҳатлангани айтилган.

Жаҳон соғлиқни сақлаш ташкилоти маълумотларига кўра, Суданда тахминан 33,7 миллион киши, яъни мамлакат аҳолисининг қарийб учдан икки қисми гуманитар ёрдамга муҳтож. Уруш бошланганидан бери миллионлаб одамлар ўз уйларини тарк этган.