Трамп Исроил президенти Герцогни Нетаняҳуни афв этишга ундамоқда

Трампнинг чоршанба куни “Axios” нашрига айтишича, Нетаняҳу сешанба оқшомидаги суҳбат чоғида Эронга эътибор қаратиш ўрнига, ўзининг коррупцияга оид суд жараёни ҳақида гапирган ва чоршанба куни яна судга боришини маълум қилган. "Урушнинг қоқ ўртасида-я? Қўйсангиз-чи", — деди Трамп.

Исроил Бош вазири Бинямин Нетаняху чоршанба куни Ғазо секторига йўл олган гуманитар ёрдам флотилияси билан боғлиқ хавфсизлик масалаларини муҳокама қилиш учун ўзига оид коррупция иши бўйича суд мажлисини тарк этди.

Тел-Авивдаги суд мажлиси бошланишидан олдин Нетаняҳу чоршанба кунги тингловни уч соатгача қисқартиришни сўради, бироқ судьялар бу илтимосни рад этди. Шундан сўнг у Мудофаа вазирлигида хавфсизлик бўйича маслаҳатлашув ўтказиш учун суд залини бир соатга тарк этишга ва кейинроқ қайтиб келишга рухсат сўради, судьялар бунга розилик берди.

Нетаняҳу коррупция, порахўрлик ва мансаб ваколатини суиистеъмол қилиш бўйича учта алоҳида ишда айбланмоқда. Агар айби исботланса, у озодликдан маҳрум этилиши мумкин. Айблов хулосаси 2019 йил ноябрь ойида Бош прокурор томонидан эълон қилинган.

Бир неча ой давомида Герцогга қайта-қайта танқидий ҳужумлар қилган Трамп бу сафар юмшоқроқ оҳангда гапириб, Герцог “агар Бибини афв этса, миллий қаҳрамонга айланади. Бундан жуда миннатдор бўлардим”, деди.

Унинг сўзларига кўра, Нетаняҳунинг судланиши Исроилни “ёмон кўрсатмоқда” ва у айбловларни “шароб ва сигарет” каби аҳамиятсиз деб ҳисоблади. 

“Биби — уруш даври бош вазири. Унинг бошида бундай айбловлар осилиб туриши мумкин эмас”, — деди Трамп.

Трамп ўтган йилнинг июнь ойидан бери Нетаняҳуни авф этишни ёқлаб, унга қарши очилган коррупция ишини АҚШда ўзи дуч келган ҳуқуқий муаммоларга ўхшаш “жодугарлар ови” деб атаб келади.

Исроилда октябрь ойида сайловлар ўтказилиши режалаштирилган ва агар Нетаняҳу мағлубиятга учраса, унинг қамоққа тушиш эҳтимоли кескин ошиши мумкин.

Нетаняҳу ҳеч қандай қонунбузарликни тан олмади ва пушаймонлик ҳам билдирмади, ваҳоланки бу икки жиҳат Исроил қонунчилигига кўра афв этишнинг асосий шартларидир.

Март ойида “Axios” нашрига берган интервьюсида Трамп Нетаняҳуни афв этмагани учун Герцогни “шарманда” деб атаган эди. Бошқа бир интервьюсида эса уни “заиф ва аянчли” деган.