Tramp Isroil prezidenti Gersogni Netanyahuni afv etishga undamoqda

Trampning chorshanba kuni “Axios” nashriga aytishicha, Netanyahu seshanba oqshomidagi suhbat chog‘ida Eronga e’tibor qaratish o‘rniga, o‘zining korrupsiyaga oid sud jarayoni haqida gapirgan va chorshanba kuni yana sudga borishini ma’lum qilgan. "Urushning qoq o‘rtasida-ya? Qo‘ysangiz-chi", — dedi Tramp.

Isroil Bosh vaziri Binyamin Netanyaxu chorshanba kuni G‘azo sektoriga yo‘l olgan gumanitar yordam flotiliyasi bilan bog‘liq xavfsizlik masalalarini muhokama qilish uchun o‘ziga oid korrupsiya ishi bo‘yicha sud majlisini tark etdi.

Tel-Avivdagi sud majlisi boshlanishidan oldin Netanyahu chorshanba kungi tinglovni uch soatgacha qisqartirishni so‘radi, biroq sudyalar bu iltimosni rad etdi. Shundan so‘ng u Mudofaa vazirligida xavfsizlik bo‘yicha maslahatlashuv o‘tkazish uchun sud zalini bir soatga tark etishga va keyinroq qaytib kelishga ruxsat so‘radi, sudyalar bunga rozilik berdi.

Netanyahu korrupsiya, poraxo‘rlik va mansab vakolatini suiiste’mol qilish bo‘yicha uchta alohida ishda ayblanmoqda. Agar aybi isbotlansa, u ozodlikdan mahrum etilishi mumkin. Ayblov xulosasi 2019-yil noyabr oyida Bosh prokuror tomonidan e’lon qilingan.

Bir necha oy davomida Gersogga qayta-qayta tanqidiy hujumlar qilgan Tramp bu safar yumshoqroq ohangda gapirib, Gersog “agar Bibini afv etsa, milliy qahramonga aylanadi. Bundan juda minnatdor bo‘lardim”, dedi.

Uning so‘zlariga ko‘ra, Netanyahuning sudlanishi Isroilni “yomon ko‘rsatmoqda” va u ayblovlarni “sharob va sigaret” kabi ahamiyatsiz deb hisobladi. 

“Bibi — urush davri bosh vaziri. Uning boshida bunday ayblovlar osilib turishi mumkin emas”, — dedi Tramp.

Tramp o‘tgan yilning iyun oyidan beri Netanyahuni avf etishni yoqlab, unga qarshi ochilgan korrupsiya ishini AQShda o‘zi duch kelgan huquqiy muammolarga o‘xshash “jodugarlar ovi” deb atab keladi.

Isroilda oktyabr oyida saylovlar o‘tkazilishi rejalashtirilgan va agar Netanyahu mag‘lubiyatga uchrasa, uning qamoqqa tushish ehtimoli keskin oshishi mumkin.

Netanyahu hech qanday qonunbuzarlikni tan olmadi va pushaymonlik ham bildirmadi, vaholanki bu ikki jihat Isroil qonunchiligiga ko‘ra afv etishning asosiy shartlaridir.

Mart oyida “Axios” nashriga bergan intervyusida Tramp Netanyahuni afv etmagani uchun Gersogni “sharmanda” deb atagan edi. Boshqa bir intervyusida esa uni “zaif va ayanchli” degan.