Ukraina hujumlari oqibatida Rossiyada 7 kishi halok bo‘ldi, neft bazasida yong‘in kelib chiqdi

18-iyul kuni Ukraina dronlarining Rossiya bir necha to‘lqinli hujumi oqibatida 7 nafar ombor xodimi halok bo‘lgan, yana o‘nlab odam jarohatlangan.

Shuningdek, hujumlardan birida poytaxt yaqinidagi neft bazasida yong‘in kelib chiqqan.

Gubernator Yevgeniy Pervishovning so‘zlariga ko‘ra, Moskvadan taxminan 475 kilometr janubi-sharqda joylashgan Tambov viloyatining Kotovsk shahrida Rossiyaning eng yirik onlayn-riteyleri “Wildberries”ga qarashli omborga Ukraina dronlari kelib urilishi natijasida 25 kishi tan jarohati olgan.

“Tungi smenada ishlayotgan yetti kishi voqea joyida halok bo‘ldi”, — deb yozdi Pervishov Telegram’da va yaqinlashib kelayotgan yana 28 ta dron urib tushirilganini qo‘shimcha qildi.

“Agar ular maqsadiga erishganida, tinch aholi orasidagi qurbonlar soni bundan ancha ko‘p bo‘lishi mumkin edi”, — dedi u.

Moskva viloyati gubernatori Andrey Vorobyov boshqa bir hujumda Moskvaning sharqidagi Elektrostal shahrida joylashgan “Wildberries”ning yana bir omboriga dron hujumi oqibatida 24 kishi jarohatlanganini ma’lum qildi.

Wildberries hammuassisi va bosh direktori Tatyana Kim bu Rossiya hamda kompaniya uchun “dahshatli tun” bo‘lganini aytib, qurbonlarning oila a’zolariga hamdardlik bildirdi.

Vorobyovning so‘zlariga ko‘ra, Moskva viloyatining Noginsk shahrida ham uchuvchisiz uchoq qoldiqlarining qulashi neft omborida yong‘in keltirib chiqargan.

U obyektga yetkazilgan zarar miqdoriga aniqlik kiritmadi, biroq Noginskda ikki kishi jarohat olgani va yaqin atrofdagi tug‘uruqxona evakuatsiya qilinganini ma’lum qildi.