Украина Россияга қарши уруш учун 20 млрд доллар сўрамоқчи

Ҳозирги жанг майдонидаги Россиядан устунлигини мустаҳкамлаш учун Украина иттифоқчиларидан қўшимча 20 миллиард доллар ҳарбий ёрдам сўрамоқчи, деган хабар Украина мудофаа вазирлигидан аноним тарзда сиздирилди.

Ушбу сўров 18-куни “Рамштейн гуруҳи” номи билан танилган Украина мудофааси бўйича Киевга молиявий ва ҳарбий кўмак кўрсатувчи 50 дан ортиқ давлат иттифоқи гуруҳининг йиғилишида ўртага ташланади.

Украинанинг ўрта масофага учувчи дронлари таъминот ва логистика занжирларига зарба бергани сабабли, Россиянинг бу йилги юриши секинлашди ва ўтган ой тўхтаб қолди деярли. Айни пайтда, узоқ масофага учувчи дрон зарбалари Россия энергетика секторига жиддий зарар етказмоқда.

Украинага пул керак

Сўнгги ҳафталарда жанг майдонидаги ўзгаришлар Россияни музокаралар столига Киев учун анча қулай шартларда олиб келиш имконини берганини таъкидлади украиналик ҳарбийлар.

Украина дрон кучлари қўмондони Роберт Бровдининг Reuters агентлигига айтишича, унинг стратегик мақсади – дрон ҳужумларини кучайтириб, таъминот йўллари ва логистикасини издан чиқариш орқали Россия қўшинларини фронт чизиғидан чекинишга мажбурлаш.

Бунга эришиш учун эса Украинага пул керак.

“Украинадаги дронларнинг ишлаб чиқариш қуввати, сифати ва уларни бошқарувчи экипажлар сони Россия иқтисодиётига ҳалокатли зарбалар бериш, логистикасини издан чиқариш ва шахсий таркибини йўқ қилиш учун етарли”, — деди Бровди.

Россия олдинга силжияпти - Путин

Ўтган ой Зеленский Киевнинг стратегик мавқейи яхшиланганидан фойдаланиб, Россия билан тинчлик музокараларини қиш келмасидан олдин илгари суриш истагини билдирган эди.

Бироқ, Путиннинг айтишича, Россия кучлари ҳар куни олдинга силжимоқда ва бундай музокараларга ҳожат йўқ. Шунингдек, Украина зарбалари зиён етказаётганини тан олди Россия президенти.

Politico нашрига кўра, келаси ҳафтадаги йиғилишда 20 миллиард долларлик мақсадга эришиш учун айрим иттифоқчилардан ёрдам ёки қарз шаклида 2 миллиарддан 6 миллиард долларгача ҳисса қўшиш сўралади.