Европада 12 тонна KitKat маҳсулоти ўғирланди

Бош қароргоҳи Швейцариянинг Вевей шаҳрида жойлашган компаниянинг жума куни берган баёнотида “транспорт воситаси ҳам, унинг юки ҳам ҳали топилмагани” айтилган.

Шоколадли вафлидан тайёрланган қарсилдоқ батончалар партияси ўтган ҳафта ишлаб чиқариш ва тарқатиш манзиллари орасидаги йўлда ғойиб бўлган. Режага мувофиқ шоколад батончалари бутун Европа бўйлаб тарқатилиши керак эди.

Компания хабарига кўра, йўқолган ширинликлар Европа бозорларидаги норасмий савдо тармоқларига чиқиши мумкин. Агар бу содир бўлса, ҳар бир батонларга бириктирилган ноёб серия коди ёрдамида маҳсулотларни аниқлаш имкони мавжуд.

Яъни, истеъмолчилар ва сотувчилар маҳсулот қадоғидаги серия рақамларини сканерлаш орқали ўғирланган маҳсулот эканлигини билишлари мумкин. Агар рақамлар мос келса, сканерда компанияни қандай хабардор қилиш ҳақида аниқ кўрсатмалар пайдо бўлади. Шу орқали компания далилларни тегишли идораларга улашади.

Компания ўғирлик билан боғлиқ қўшимча маълумотларни ошкор этмади, тергов эса давом этмоқда.