Европа Иттифоқи болаларни ижтимоий тармоқлардан чекламоқчи

Европа Комиссияси президенти Урсула фон дер Ляйен 16 сентябрь куни Европа парламентидаги Мурожаатномасида болаларни онлайн хавфлардан ҳимоя қилишга қаратилган EU Kids Act ташаббусини тақдим этди.

Таклифга кўра, 13 ёшга тўлмаган болалар ижтимоий тармоқлардан фойдалана олмайди. 15 ёшгача эса шахсий аккаунтлардан фойдаланишга рухсат берилмайди.

13–15 ёшдаги болалар учун ота-она ёки васий томонидан яратилган ва назорат қилинадиган махсус «мини-аккаунтлар» жорий этилиши режалаштирилган. Улар чекланган функцияларга эга бўлади ва кунига бир соатгача фойдаланиш лимити белгиланади.

15–18 ёшдаги ўсмирлар учун эса ижтимоий тармоқ платформалари хавфсиз дизайн талабларига риоя қилиши шарт бўлиши таклиф этилмоқда.

Фон дер Ляйен технологик компаниялар платформаларда қарамликни кучайтирувчи функциялар ва болаларни тобора кескинроқ контентга жалб қилувчи механизмларга йўл қўймаслиги кераклигини таъкидлади.

У, шунингдек, қизларнинг суратларидан сунъий интеллект ёрдамида сексуаллаштирилган тасвирлар яратилишига қарши чоралар зарурлигини билдирди.

Европа Комиссияси ташаббусида платформалар учун исботлаш юкини ўзгартириш ҳам кўзда тутилмоқда. Яъни компаниялар ўз хизматлари хавфсиз эканини исботлаши керак бўлади.

Ҳозирча бу чоралар таклиф босқичида. Улар Европа Иттифоқида мажбурий қоидага айланиши учун кейинги қонунчилик жараёнларидан ўтиши керак.