Европа Иттифоқи ва Украина дрон ишлаб чиқариш бўйича келишувга эришди

Украина ва Европа Иттифоқи Киевнинг тажрибаси ҳамда Европанинг саноат салоҳиятини бирлаштиришга қаратилган “дрон келишуви”ни имзолади.

Энди қўшма лойиҳалар йўлга қўйилиб, дрон ишлаб чиқариш ҳажми оширилади. Бу ҳақда Еврокомиссия президенти Урсула фон дер Ляйен 15 июль куни маълум қилди.

“Биз кучли томонларимизни бирлаштиришимиз лозим. Бу келишув Украина ихтирочилиги ва Европанинг саноат масштабини бирлаштиради”, — деди фон дер Ляйен Киевда Украина Давлатчилиги куни шарафига ўтказилган маросимдаги нутқида.

Украина бунгача алоҳида давлатлар билан ҳам шундай ҳамкорлик битимларини имзолаган.

Хусусан, 7–8 июль кунлари Анқарада бўлиб ўтган НАТО саммитида президент Володимир Зеленский яна 3 та дронлар бўйича келишув имзолади. Унинг айтишича, бу каби битимлар сони тўққизтага етган.

Чоршанбада имзоланган ҳужжат эса Европа Иттифоқига аъзо давлатлар ва компанияларни қамраб оладиган илк келишувдир.

“Сизнинг дрон ва антидрон тизимларини бошқариш бўйича орттирган тажрибаларингиз чиндан ҳам бебаҳо”, — деди фон дер Ляйен Зеленскийга мурожаат қилиб.

“Биз ушбу имкониятдан биргаликда фойдаланишимиз керак. Чунки Европа бу соҳада қандай таҳдидларга дуч келаётганини яхши биламиз. Европа Иттифоқининг кўплаб давлатларида ҳаво ҳудудига ноқонуний кириш ҳолатлари ва огоҳлантиришлар кузатилмоқда”, — дея қўшимча қилди у.

Фон дер Ляйеннинг сўзларига кўра, Европа Иттифоқи Украинага “катта технологик ва саноат салоҳияти” ҳамда “хавфсиз ва ишончли ишлаб чиқариш майдонлари”ни таклиф қила олади.

Экспорт қилинаётган дрон тажрибаси

Россия 2022 йил февралида Украинага бостириб кирган пайтда мамлакат дрон соҳасида чекланган тажрибага эга эди. Шундан сўнг Украина юқори даражада ривожланган дрон саноатини шакллантириб олди.

Зеленский дрон бўйича ҳамкорлик битимларини кенгайтириш мақсадида турли давлатларга ташриф буюрмоқда. Айниқса, Форс кўрфази мамлакатлари Эрон ҳужумларига қарши курашишда Украинанинг тажрибасидан фойдаланишга катта қизиқиш билдирган.