Хитойда етим йигитнинг тўйига минглаб нотаниш одамлар келди

Яқин қариндошлари камлиги сабаб тўйи бўш ўтишидан хавотирланган 24 ёшли йигит ижтимоий тармоқ орқали нотаниш одамларни базмга таклиф қилди. Унинг чақириғига Хитойнинг турли ҳудудларидан минглаб одамлар жавоб берди.

Хитойнинг Юннан провинсияси Чжаотун шаҳри Йилианг уездида яшовчи 24 ёшли Сю Ченгхун 31 октябр куни турмуш қурди. У тўйига қариндошлари ва дўстлари камлиги сабабли интернет фойдаланувчиларини таклиф қилган. Натижада мамлакатнинг турли ҳудудларидан минглаб одамлар унинг тўйига боришга қарор қилди.

Йигит 25 октябр куни Доуйин ижтимоий тармоғида видеомурожаат эълон қилиб, 31 октябрда бўладиган тўйига келишни сўраган. У дастлаб 10–20 киши келиб, тўй дастурхонидаги бўш жойларни тўлдирса кифоя, деб ўйлаган.

Сю уч ёшида отасидан айрилган. Икки йилдан сўнг онаси бошқа турмуш қурган ва у акаси билан бувисининг қўлида қолган. Бувиси ҳам икки йил ўтиб вафот этганидан кейин ака-ука қариндошлари кўмагида улғайган. Сю мактабни ташлаб, турли жойларда меҳнат қилиб пул топган.

У уч йилдан бери севишиб юрган қизига уйланиш учун 160 минг юандан ортиқ маблағ йиғган. Бироқ тўйга яқинлашганида, икки томоннинг қариндошлари жами икки-учта столни ҳам тўлдира олмаслиги маълум бўлган.

Интернетдаги таклиф тез тарқалди. 27 октябрга келиб, йигитнинг уйига қарийб 200 киши ташриф буюрган. 28  октябр куни эса Хитойнинг турли ҳудудларидан келган меҳмонлар сони 2–3 минг нафарга етгани хабар қилинди.

Меҳмонлар қуруқ қўл билан келмади: улар музлаткич, иситиш печи, стуллар, озиқ-овқат маҳсулотлари ва ҳатто бутун бошли чўчқа олиб келган. Айримлар ошпазларни ҳам таклиф қилиб, тўй таомини тайёрлашга ёрдам берган.

Меҳмонлар сони кутилганидан анча ошиб кетгани сабабли дастлабки тўй жойи ўзгартирилди. Маҳаллий ҳукумат тадбирни Луован Мяо қишлоғидаги кўчириш манзилгоҳи майдонида ўтказишга кўмаклашди. Шунингдек, транспорт ҳаракатини тартибга солиш, жамоат хавфсизлиги ва озиқ-овқат хавфсизлигини таъминлаш чоралари кўрилди.

30 октябр куни Хитойнинг Kankan News нашри тадбир жойида қарийб 20 минг киши бўлганини хабар қилди. 31 октябрь куни эса тўй дастурхонини тайёрлаш учун Хитойнинг турли ҳудудларидан келган ошпазлар иш олиб борди. Меҳмонлар олиб келган товуқ, мол ва қўй гўштлари ҳам тўй таомларини тайёрлашга йўналтирилди.

Шу тариқа, дастлаб бир неча ўн кишини таклиф қилишни режалаштирган йигитнинг тўйи минглаб нотаниш инсонлар иштирокидаги катта тадбирга айланди.