Пезешкиан БМТ минбарида: «Эрон терроризм қурбони»

Пезешкиан АҚШ президенти Дональд Трампнинг Эронни терроризмнинг асосий ҳомийси сифатида танқид қилган баёнотларини рад этиб, «Эрон терроризм қурбони» эканини таъкидлади. У нутқ вақтида ҳалок бўлган эронлик болалар ва Олий раҳбар Али Хоманаийнинг суратларини кўрсатди.

Эрон президенти мамлакат ядровий қурол яратишга интилмаётганини, бироқ тинч мақсадлардаги ядровий технологиялардан воз кечмаслигини билдирди. Шунингдек, у Исроилнинг ядровий салоҳияти ва Эронга нисбатан халқаро назорат масаласида «икки хил стандарт» мавжудлигини айтди.

Пезешкиан Ҳурмуз бўғози масаласида ҳам Теҳрон ўз манфаатларини чеклашга уринишларни қабул қилмаслигини билдирди.

У Эрон ташқи босим остида таслим бўлмаслигини, бироқ ўзаро ҳурмат асосида дипломатик музокараларга тайёр эканини таъкидлади.

Пезешкиан нутқ сўзлаётган вақтда АҚШ делегацияси БМТ Бош Ассамблеяси залини тарк этди. АҚШ ва Исроил вакиллари Эрон президентининг баёнотларини танқид қилди.

Муаллиф: Ҳасанбой ОЧУН