Озарбайжонда мактаб формасига норозиликларда 37 киши ҳибсга олинди

Озарбайжон пойтахти Бокуда мактаб формасига оид янги қоидаларга қарши норозиликлар фонида 37 киши ҳибсга олинди. Бу ҳақда CentralAsia хабар берди. 

Маълумотга кўра, намойишчилар мактаб ходимлари билан тўқнашган, таълим муассасалари фаолияти ва транспорт ҳаракатига халақит беришга уринган.

Бокудаги Гарадоғ туманида мактаб директорларидан бирининг автомобили ёқиб юборилган. Ясамал туманида эса мактабни ёқишга уриниш бўлган. Ҳар икки ҳолатда ҳам жабрланганлар йўқ.

Норозиликлар давомида Instagram ва TikTok фаолиятида ҳам узилишлар кузатилгани айтилмоқда.

Ҳодисалар юзасидан Озарбайжон Жиноят кодексининг 233-моддаси – жамоат тартибини бузишга олиб келадиган ҳаракатларни ташкил этиш ёки уларда фаол қатнашиш бўйича жиноий иш қўзғатилган. Мазкур модда бўйича уч йилгача озодликдан маҳрум қилиш жазоси белгиланиши мумкин.

Мактаб формасига қандай талаблар жорий этилди?

Озарбайжон ҳукумати 21 сентябрь куни мактаб формасига оид янги қоидаларни тасдиқлаган. Унга кўра, ўқувчиларга таълимнинг дунёвий хусусиятига зид ёки ягона мактаб формаси талабларига мос келмайдиган кийимларда дарсга келиш тақиқланган. 6 октябрдан бошлаб шунга ўхшаш талаблар ўқитувчиларга ҳам татбиқ этилган.

12 октябрь куни мактабларда янги қоидаларга риоя қилинишини текшириш бошланган. APA агентлиги хабарига кўра, талабга мос кийимда келмаган ўқувчилар билан мактаб шифокорлари ва психологлари иштирокида суҳбатлар ўтказилган. Уларнинг ота-оналари ҳам тушунтириш бериш учун мактабга таклиф қилинган.

Ҳокимият вакиллари диний кийимларга қўйилган чекловларни ўқувчилар ўртасида тенгликни таъминлаш ва таълим муассасаларида бетараф муҳитни сақлаш зарурати билан изоҳламоқда.

Парламент депутати Севинж Фаталиева мактаб формасининг ягона бўлиши болалар ўртасидаги ижтимоий ва диний фарқларни камайтиришга хизмат қилишини таъкидлаган. Унинг фикрича, форма талаблари диний эътиқодга қарши кураш эмас, балки таълим муҳитининг бетарафлигини ҳимоя қилиш чораси сифатида кўрилиши керак.