«Мубашшир Аҳмад жазони ўтай олмайди» — адвокат саломатлик ҳолати оғирлигини билдирди

 Бироқ унинг саломатлиги оғир экани, жазони ўташга тўсқинлик қилаётгани айтилмоқда.

Адвокат Абдуллоҳ Содиқнинг Kun.uz’га маълум қилишича, Алишер Турсуновга «Қандли диабет II тип, инсулинга муҳтож тури», шунингдек, артроз, стенокардия, юқори қон босими ва буйрак фаолияти билан боғлиқ муаммолар ташхислари қўйилган. Уламонинг оёқлари шишиб кетган, танасида яралар пайдо бўлаётган бўлса-да, тўлиқ даволанишига рухсат берилмаяпти.

Адвокатнинг айтишича, 2025 йил ноябрь ойида Турсунов расман 3 марта амбулатор даволангани кўрсатилган. Аммо 26 декабрь куни бўлиб ўтган учрашувда маҳбус бу муолажалар амалда берилмаганини, у фақат тиббий кўрикдан ўтказилганини билдирган. Шунингдек, дори-дармон билан таъминланмагани ва ётиб даволанишига рухсат йўқлигини айтган.

Шунга қарамай, уни 16 соатлаб оғир жисмоний меҳнатга, хусусан ғишт заводида ишлашга мажбурлашаётгани маълум қилинди. Адвокат бу ҳолат Турсуновнинг ҳаёти ва соғлиги учун жиддий хавф туғдиришини таъкидламоқда.

Адвокатнинг таъкидлашича, Ўзбекистон Республикаси Жиноят кодексининг 75-моддасига кўра, жазони ўташга тўсқинлик қиладиган оғир касалликка чалинган шахс жазодан озод қилиниши мумкин. «Қандли диабет II тип» ушбу модда асосида озод қилишга сабаб бўладиган касалликлар рўйхатига киритилган.

Шу муносабат билан адвокат томонидан ИИВ, Бош прокуратура ва бошқа мутасадди идораларга аризалар киритилган.