Оксфорд билан ҳамкорлик: Янги Ўзбекистон университети халқаро майдонга чиқмоқда

Расмий баёнотда таъкидланишича, бундай нуфузли университет билан ҳамкорлик Янги Ўзбекистон университетининг халқаро академик майдондаги мавқеини янги босқичга олиб чиқади.

Оксфорд университети сўнгги йилларда Times Higher Educationнинг World University Rankings рейтингида кетма-кет жаҳоннинг биринчи рақамли университети сифатида эътироф этилмоқда. Шунингдек, QS World University Rankings рейтингларида ҳам доимий равишда энг юқори поғоналарда қайд этилади.

Oxford Hub платформаси Ўзбекистон олий таълим муассасаларига Оксфорд университетининг етакчи олимлари ва мутахассисларининг илғор тадқиқотларига тизимли ва расмий асосда кириш имкониятини яратади.

Ташаббус Оксфорд университети таркибидаги Wolfson College ҳузурида фаолият юритувчи Oxford Birsöz Initiative томонидан мувофиқлаштирилади ва Буюк Британия ҳукумати кўмагида амалга оширилади.

Таъкидланишича, мазкур ҳамкорлик сунъий интеллект, муҳандислик, илғор технологиялар ва илм-фаннинг бошқа йўналишларида Ўзбекистон ва Британия олимлари ўртасида кенг кўламли ҳамкорлик ҳамда янги илмий тадқиқотларга замин яратади.

Мактабгача ва мактаб таълими вазири Эъзоза Каримова платформа ишга туширилиши академик ҳамкорлик, профессор-ўқитувчилар алмашинуви ва қўшма илмий тадқиқотларда муҳим аҳамият касб этишини қайд этди.

Тадбирда Буюк Британиянинг Марказий Осиё ва Озарбайжон бўйича савдо вакили Жон Олдердайсга Янги Ўзбекистон университетининг «Фахрий профессори» унвони топширилди.

Лорд Жон Олдердайс Ўзбекистонда таълим соҳасида амалга оширилаётган ислоҳотлар мамлакат тараққиётига хизмат қилишини таъкидлади.