Ўзбекистон ва ЕИ муносабатлари янги стратегик босқичга кўтарилди

Учрашувда жорий йил апрель ойида Самарқандда ўтган «Марказий Осиё – Европа Иттифоқи» биринчи саммитида эришилган келишувларни амалга ошириш ҳамда кўп қиррали Ўзбекистон–ЕИ ҳамкорлигини янада кенгайтириш масалалари муҳокама қилинди.

Етакчилар бугун имзоланган Кенгайтирилган шериклик ва ҳамкорлик тўғрисидаги битимни юқори баҳоладилар. Ушбу тарихий ҳужжат икки томонлама муносабатларнинг ҳуқуқий асосларини кенгайтириш, шу билан бирга, янги стратегик кун тартибини белгилаб беришини таъкидладилар.

Битим Европа Иттифоқига аъзо давлатлар билан, хусусан, савдо, инвестициялар, транспорт, энергетика, иқлим, юқори технологиялар ва маданий-гуманитар ҳамкорлик соҳаларида алоқаларни янги босқичга олиб чиқиши кутилмоқда.

Томонлар Ўзбекистоннинг Жаҳон савдо ташкилотига аъзолиги бўйича музокаралар якунланганини ҳам олқишладилар.

Ташриф арафасида Ўзбекистон делегацияси Европа Иттифоқининг «Глобал дарвоза» форумида иштирок этди, шунингдек, Ҳамкорлик кенгаши ҳамда Иқтисодиёт, савдо ва инвестициялар бўйича кичик қўмита йиғилишлари ўтказилди.

Кеча Брюсселда йирик қўшма бизнес форуми бўлиб ўтди. Бугун эса Европанинг етакчи компаниялари ва молиявий тузилмалари раҳбарлари билан учрашув ўтказилди. Унда энергетика, кимё, муҳим минераллар, логистика, тўқимачилик ва фармацевтика соҳаларида умумий қиймати 10 миллиард евродан зиёд бўлган янги лойиҳаларни амалга ошириш бўйича келишувга эришилди.

Бу ҳозирда Европа компаниялари иштирокидаги 40 миллиард евродан зиёд инвестиция портфелига салмоқли қўшимча бўлади.

Шунингдек, шерикликнинг юқори суръатини сақлаб қолиш учун институционал механизмларни мустаҳкамлаш, янги истиқболли лойиҳаларни илгари суриш ҳамда виза тартиботларини соддалаштириш орқали ишбилармонлик ва инсонлар алоқаларини кучайтириш зарурлиги қайд этилди.

Учрашув якунида Қўшма баёнот қабул қилинди.