1 августдан камёб ҳайвонларни овлаш тақиқланади

Ҳукуматнинг 2026 йил 30 июнда қабул қилинган “Ҳайвонот дунёси йўқотишларининг ўрнини қоплаш ҳамда камёб ва йўқолиб кетиш хавфи юқори бўлган ёввойи ҳайвонларни ҳимоя қилиш чора-тадбирлари тўғрисида”ги қарори мамлакат экотизимини муҳофаза қилишга қаратилган ҳуқуқий ҳужжатдир.

Ов қилишга стратегик чеклов

Қарорга мувофиқ, 2026 йил 1 августдан 2028 йил 1 январга қадар қарор иловасида белгиланган Ўзбекистондаги камёб ва йўқолиб кетиш хавфи юқори бўлган ёввойи ҳайвонларни ов қилиш тақиқланади.

Бу чекловнинг асосий мақсади табиатда сони кескин камайиб бораётган ҳайвонлар популяциясини қайта тиклаш, уларнинг табиий кўпайиши учун қулай шароит яратиш ҳамда мамлакатнинг биологик бойлигини сақлаб қолишдан иборат.

Илмий тадқиқотлар ва питомниклар истисно

Қарор барча ҳолатларда ҳам мутлақ тақиқ жорий қилмайди. Хусусан, чеклов фермалар, питомниклар, инкубаторлар, балиқчилик питомниклари ва ҳовуз хўжаликларида сақланаётган ёки етиштирилаётган ёввойи ҳайвонларга, илмий тадқиқотлар, тиббий мақсадларда фойдаланиш учун амалга ошириладиган ов ишларига татбиқ этилмайди.

Камёб турларга ов квотаси берилмайди

Ов қилиш тақиқланган ҳайвон турлари учун энди ов квотаси ажратилишига йўл қўйилмайди.

Бу амалиёт аввалги йилларда айрим ҳолларда юзага келиши мумкин бўлган ҳуқуқий зиддиятларни бартараф этади. Яъни, бир томондан муҳофаза қилинаётган ҳайвонлар рўйхатига киритилган турлар учун иккинчи томондан ов қилиш квотаси белгиланиши мумкин эмас.

Дарёлар чавоқлантирилади

Ҳужжатга кўра, 2026 йил 1 августдан 2030 йил 1-январга қадар республика марказий шаҳарларидан оқиб ўтувчи дарё ва сойларга ҳар йили камида 15 тонна чавоқ қўйиб борилади.

Чавоқлантириш Экология ва иқлим ўзгариши миллий қўмитаси ҳамда Фанлар академияси томонидан илмий асосланган рўйхат бўйича бажарилади.

Бу орқали сув ҳавзаларида биологик хилма-хиллик сақлаш, балиқ захираларини тиклаш, сув экотизимининг табиий мувозанати мустаҳкамлаш, шаҳар дарёларининг экологик ҳолатини яхшилаш мақсад қилинган.

Экология — келажакка сармоя

• Соғлом экотизим:
• экологик туризм ривожига хизмат қилади;
• қишлоқ хўжалиги учун табиий мувозанатни таъминлайди;
• сув ресурсларини муҳофаза қилади;
• иқлим ўзгариши оқибатларини юмшатишга ҳисса қўшади.