1-avgustdan kamyob hayvonlarni ovlash taqiqlanadi

Hukumatning 2026-yil 30-iyunda qabul qilingan “Hayvonot dunyosi yo‘qotishlarining o‘rnini qoplash hamda kamyob va yo‘qolib ketish xavfi yuqori bo‘lgan yovvoyi hayvonlarni himoya qilish chora-tadbirlari to‘g‘risida”gi qarori mamlakat ekotizimini muhofaza qilishga qaratilgan huquqiy hujjatdir.

Ov qilishga strategik cheklov

Qarorga muvofiq, 2026-yil 1-avgustdan 2028-yil 1-yanvarga qadar qaror ilovasida belgilangan O‘zbekistondagi kamyob va yo‘qolib ketish xavfi yuqori bo‘lgan yovvoyi hayvonlarni ov qilish taqiqlanadi.

Bu cheklovning asosiy maqsadi tabiatda soni keskin kamayib borayotgan hayvonlar populyatsiyasini qayta tiklash, ularning tabiiy ko‘payishi uchun qulay sharoit yaratish hamda mamlakatning biologik boyligini saqlab qolishdan iborat.

Ilmiy tadqiqotlar va pitomniklar istisno

Qaror barcha holatlarda ham mutlaq taqiq joriy qilmaydi. Xususan, cheklov fermalar, pitomniklar, inkubatorlar, baliqchilik pitomniklari va hovuz xo‘jaliklarida saqlanayotgan yoki yetishtirilayotgan yovvoyi hayvonlarga, ilmiy tadqiqotlar, tibbiy maqsadlarda foydalanish uchun amalga oshiriladigan ov ishlariga tatbiq etilmaydi.

Kamyob turlarga ov kvotasi berilmaydi

Ov qilish taqiqlangan hayvon turlari uchun endi ov kvotasi ajratilishiga yo‘l qo‘yilmaydi.

Bu amaliyot avvalgi yillarda ayrim hollarda yuzaga kelishi mumkin bo‘lgan huquqiy ziddiyatlarni bartaraf etadi. Ya’ni, bir tomondan muhofaza qilinayotgan hayvonlar ro‘yxatiga kiritilgan turlar uchun ikkinchi tomondan ov qilish kvotasi belgilanishi mumkin emas.

Daryolar chavoqlantiriladi

Hujjatga ko‘ra, 2026-yil 1-avgustdan 2030-yil 1-yanvarga qadar respublika markaziy shaharlaridan oqib o‘tuvchi daryo va soylarga har yili kamida 15 tonna chavoq qo‘yib boriladi.

Chavoqlantirish Ekologiya va iqlim o‘zgarishi milliy qo‘mitasi hamda Fanlar akademiyasi tomonidan ilmiy asoslangan ro‘yxat bo‘yicha bajariladi.

Bu orqali suv havzalarida biologik xilma-xillik saqlash, baliq zaxiralarini tiklash, suv ekotizimining tabiiy muvozanati mustahkamlash, shahar daryolarining ekologik holatini yaxshilash maqsad qilingan.

Ekologiya — kelajakka sarmoya

Sog‘lom ekotizim:

• ekologik turizm rivojiga xizmat qiladi;
• qishloq xo‘jaligi uchun tabiiy muvozanatni ta’minlaydi;
• suv resurslarini muhofaza qiladi;
• iqlim o‘zgarishi oqibatlarini yumshatishga hissa qo‘shadi.