Светофор – йўлчироқ, парол – ўрон, аванс – бўнак: юридик атамалар ўзгартирилмоқда

Олий Мажлис Қонунчилик палатасининг навбатдаги мажлиси бўлиб ўтди.

Мажлисда “Ўзбекистон Республикасининг айрим қонун ҳужжатларига ўзгартиришлар киритиш тўғрисида”ги қонун лойиҳаси биринчи ўқишда муҳокама қилинди.

Ушбу қонун лойиҳасида қонунчилик ҳужжатларида фойдаланилган айрим тушунча ва юридик атамаларни ягона шаклда қўллаш ва уларнинг тўғри баён этилишини таъминлаш мақсадида ўзгартиришлар киритиш таклиф этилмоқда.

Хусусан қуйидаги ўзгартиришлар назарда тутиляпти:

• аванс – бўнак;
  маркировка – тамғалаш;
  маршрут – йўналиш;
  светофор – йўлчироқ;
  коворкинг – иш маркази;
  парол – ўрон;
  прогрессив –илғор.

Қайд этилишича, лойиҳанинг қабул қилиниши қонун ҳужжатларидаги тушунча ва юридик атамаларнинг қўлланилишидаги ноаниқликларни бартараф этишга, уларни бирхиллаштиришга хизмат қилади.

Эътироз билдирилди

“Адолат” социал-демократик партиясидан Наримон Умаров “светофор” ва “парол” сўзларининг алмаштирилишига эътироз билдирди.

"Яқин тарихда “аэродром” номини янгилаб, газетани “рўзнома”га алмаштиргандик. Булар қанчалик зарур?" – деди Наримон Умаров.

У сўзида давом этар экан, 19-аср бошида Саидкаримбой Тошкентга йўлчироқлар ўрнатиб, уларга лампа қўйганини, ҳар куни ёқиб-ўчирганини таъкидлади.

“Мана бу йўлчироқ. Светафор йўлчироқ бўлолмайди. Алмаштиришга нима зарурат бўлди?” – деди у.

Фанлар академияси Ўзбек тили, адабиёти ва фольклори институти директори Низомиддин Маҳмудов таклиф этилаётган ўзгартиришлар тил софлигини сақлаш ва уни миллий тил меъёрлари асосида ривожлантиришга қаратилганини айтди.

“Агар “йўлчироқ” сўзи ҳақида гапирадиган бўлсак, бугунги кунда “йўлчироқ” деганда ҳеч ким устунга осилган чироқни тушунмайди. “Йўлчироқ” атамасининг қўлланилиши ўзбек тилининг софлиги ва ўзига хослигини сақлаш йўлидаги қадамлардан бири сифатида қаралмоқда”, — деди у.

Қонун лойиҳаси депутатлар томонидан биринчи ўқишда қабул қилинди.