Svetofor - yo‘lchiroq, parol - o‘ron, avans - bo‘nak: yuridik atama va tushunchalar o‘zgartirilmoqda

Oliy Majlis Qonunchilik palatasining navbatdagi majlisi bo‘lib o‘tdi.

Majlisda “O‘zbekiston Respublikasining ayrim qonun hujjatlariga o‘zgartirishlar kiritish to‘g‘risida”gi qonun loyihasi birinchi o‘qishda muhokama qilindi.

Ushbu qonun loyihasida qonunchilik hujjatlarida foydalanilgan ayrim tushuncha va yuridik atamalarni yagona shaklda qo‘llash va ularning to‘g‘ri bayon etilishini ta’minlash maqsadida o‘zgartirishlar kiritish taklif etilmoqda.

Xususan quyidagi o‘zgartirishlar nazarda tutilyapti:

• avans — bo‘nak;
• markirovka — tamg‘alash;
• marshrut — yo‘nalish;
• svetofor — yo‘lchiroq;
• kovorking — ish markazi;
• parol — o‘ron;
• progressiv — ilg‘or;

Qayd etilishicha, loyihaning qabul qilinishi qonun hujjatlaridagi tushuncha va yuridik atamalarning qo‘llanilishidagi noaniqliklarni bartaraf etishga, ularni birxillashtirishga xizmat qiladi.

E’tiroz bildirildi

“Adolat” sotsial-demokratik partiyasidan Narimon Umarov “svetofor” va “parol” so‘zlarining almashtirilishiga e’tiroz bildirdi.

"Yaqin tarixda “aerodrom” nomini yangilab, gazetani “ro‘znoma”ga almashtirgandik. Bular qanchalik zarur?" – dedi Narimon Umarov.

U so‘zida davom etar ekan, 19-asr boshida Saidkarimboy Toshkentga yo‘lchiroqlar o‘rnatib, ularga lampa qo‘yganini, har kuni yoqib-o‘chirganini ta’kidladi.

“Mana bu yo‘lchiroq. Svetafor yo‘lchiroq bo‘lolmaydi. Almashtirishga nima zarurat bo‘ldi?” – dedi u.

Fanlar akademiyasi O‘zbek tili, adabiyoti va folklori instituti direktori Nizomiddin Mahmudov taklif etilayotgan o‘zgartirishlar til sofligini saqlash va uni milliy til me’yorlari asosida rivojlantirishga qaratilganini aytdi.

“Agar “yo‘lchiroq” so‘zi haqida gapiradigan bo‘lsak, bugungi kunda “yo‘lchiroq” deganda hech kim ustunga osilgan chiroqni tushunmaydi. “Yo‘lchiroq” atamasining qo‘llanilishi o‘zbek tilining sofligi va o‘ziga xosligini saqlash yo‘lidagi qadamlardan biri sifatida qaralmoqda”, — dedi u.

Qonun loyihasi deputatlar tomonidan birinchi o‘qishda qabul qilindi.