Putin “klon kabinetlar” qurdirib, oʻzi Valday oʻrmonlarida yashirinmoqda — OAV

Tadqiqotchilar minglab rasmiy videoyozuvlarni tahlil qilib, bu kabinetlar deyarli bir-biriga toʻliq mos kelishini aniqlagan. Ular faqat kichik tafsilotlar — eshik tutqichlari, devor bezaklari, kanselyariya buyumlari va pardozdagi farqlar bilan ajralib turadi.

Tergov maʼlumotlariga koʻra, Putinning shunday kabinetlari Novo-Ogaryov, Valday va Sochidagi qarorgohlarda joylashgan. Ularning barchasi bir xil dizaynda, qaymoq rangda bezatilgan va oʻxshash mebellar bilan jihozlangan.

Manbalarga koʻra, 2025-yil boshidan buyon Putin asosan Valdaydagi klon kabinetda ishlamoqda. Yanvardan sentabrgacha boʻlgan davrda uning “qaymoq rang kabinet”dagi 30 ta chiqishidan 29 tasi aynan Valdayda yozib olingan.

Bu qarorgoh Rossiyaning eng himoyalangan hududlaridan biri hisoblanadi. Uning atrofida 14 ta havo hujumidan mudofaa majmuasi, shulardan 13 tasi “Pansir” tizimi joylashtirilgan.

Siyosatshunos Konstantin Gaaze fikricha, Putin Ukraina dronlari hujumidan xavotirlanib, Sochidagi ochiq maydonda joylashgan qarorgohini tark etgan:

“Sochi togʻlar orasida ochiq joyda joylashgan. Manzarali boʻlsa-da, xavfsizlik nuqtai nazaridan noqulay. Valday esa himoyalangan, yashirin va strategik joyda joylashgan”, — deydi mutaxassis.