Қашқадарёда машина уриб кетган маст йўловчининг мурдаси пахта даласидан топилди

Дастурга кўра, йўл-транспорт ҳодисаси вилоятнинг Қарши туманида кечки соат 00:30 атрофида юз берган. Йўловчи шу вақтда онасининг уйидан маст холда чиқиб кетган. Сўнг уни машина уриб юборган. 

ИИО томонидан олиб борилган суриштирувларда ЙТҲни Қарши туманида яшовчи "Labo" ҳайдовчиси содир этгани аниқланган. Ҳайдовчи пиёдани уриб юборганидан сўнг уни автомобилига ортиб, маҳалладаги пахта майдони ёқасига ташлаб кетган. У тез тиббий ёрдам кўрсатилмагани сабабли вафот этган. 

Мазкур ҳолат юзасидан ҳайдовчига нисбатан Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлса) ва 117-моддаси 2-қисми (Хавф остида қолдириш одам ўлимига сабаб бўлса) билан жиноят иши қўзғатилган.

"Гумонланувчи процессуал тартибда ушланиб, унга қамоқ эҳтиёт чораси қўлланган. Ҳозирда унга тергов ҳаракатлари олиб борилмоқда", дейилади хабарда.

Эслатиб ўтамиз, жорий йилнинг 7 октябрь куни Сурхондарё вилоятида ҳайдовчи юк машинасида йўл четида турган уч кишини уриб юбориб, воқеа жойидан қочиб кетган эди.