Россия мигрантларга солиқ солиш эвазига давлат бюджетини бойитмоқчи

Хабарга кўра, Россия Либерал-демократик партияси (ЛДПР) раиси Леонид Слуцкий бошчилигидаги ЛДПР фракцияси томонидан мазкур масала бўйича қарор тайёрланган ҳамда у 5 август куни ҳукуматга юборилган. 

Ушбу қонун лойиҳасининг концепцияси чет эл фуқароларга нисбатан солиқ тизимининг асосий параметрларини қайта кўриб чиқишдан иборат бўлиб,  ижтимоий ва иқтисодий соҳаларда кенг кўламли миллий муаммоларни ҳал қилиш учун хизмат қилади. Бундан ташқари, мазкур солиқни жорий қилишдан асосий мақсад Россия Федерацияси бюджет тизимининг даромадларини оширишга қаратилган.

“Меҳнат муҳожирлари ҳам Россия фуқаролари билан бирдек солиқ тўлаши керак. Россия Федерацияси Солиқ кодексининг 224-моддаси 3-бандига мувофиқ Россияда солиқ резиденти бўлмаган жисмоний шахслар томонидан олинган барча даромадлар учун 30 фоиз солиқ ставкаси назарда тутилади. Патент асосида ҳақ тўланадиган меҳнат фаолияти билан шуғулланадиган чет эл фуқароларининг даромадлари ушбу меъёрнинг талабларига риоя қилмайди”, 

дейилади хабарда.

Шунингдек, Леонид Слуцкий муҳожирларнинг деярли учдан икки қисми патент асосида ёлланма ишчи сифатида ишлаётганини билдирган. Бундан ташқари, у мигрантлар топаётган пулларини хориждаги оиласига жўнатишини, аммо шу билан бирга муҳожирларнинг даромади Россия бюджети учун ишлаши кераклигини айтган. 

Маълумот учун, 2022 йил давомида Россия Федерациясида ишлаш учун рухсатнома олган хорижий фуқаролар сони 2 миллион 164 минг 6 юз кишини ташкил этган. Улардан 2 миллион 35 минг нафари меҳнат фаолиятини амалга ошириш учун патентга эга бўлган. 2023 йилда ҳам шундай кўрсаткич қайд этилган.