Rossiya migrantlarga soliq solish evaziga davlat byudjetini boyitmoqchi

Xabarga koʻra, Rossiya Liberal-demokratik partiyasi (LDPR) raisi Leonid Slutskiy boshchiligidagi LDPR fraksiyasi tomonidan mazkur masala boʻyicha qaror tayyorlangan hamda u 5 avgust kuni hukumatga yuborilgan. 

Ushbu qonun loyihasining konsepsiyasi chet el fuqarolarga nisbatan soliq tizimining asosiy parametrlarini qayta koʻrib chiqishdan iborat boʻlib,  ijtimoiy va iqtisodiy sohalarda keng koʻlamli milliy muammolarni hal qilish uchun xizmat qiladi. Bundan tashqari, mazkur soliqni joriy qilishdan asosiy maqsad Rossiya Federatsiyasi byudjet tizimining daromadlarini oshirishga qaratilgan.

“Mehnat muhojirlari ham Rossiya fuqarolari bilan birdek soliq toʻlashi kerak. Rossiya Federatsiyasi Soliq kodeksining 224-moddasi 3-bandiga muvofiq Rossiyada soliq rezidenti boʻlmagan jismoniy shaxslar tomonidan olingan barcha daromadlar uchun 30 foiz soliq stavkasi nazarda tutiladi. Patent asosida haq toʻlanadigan mehnat faoliyati bilan shugʻullanadigan chet el fuqarolarining daromadlari ushbu meʼyorning talablariga rioya qilmaydi”, 

deyiladi xabarda.

Shuningdek, Leonid Slutskiy muhojirlarning deyarli uchdan ikki qismi patent asosida yollanma ishchi sifatida ishlayotganini bildirgan. Bundan tashqari, u migrantlar topayotgan pullarini xorijdagi oilasiga joʻnatishini, ammo shu bilan birga muhojirlarning daromadi Rossiya byudjeti uchun ishlashi kerakligini aytgan. 

Maʼlumot uchun, 2022 yil davomida Rossiya Federatsiyasida ishlash uchun ruxsatnoma olgan xorijiy fuqarolar soni 2 million 164 ming 6 yuz kishini tashkil etgan. Ulardan 2 million 35 ming nafari mehnat faoliyatini amalga oshirish uchun patentga ega boʻlgan. 2023 yilda ham shunday koʻrsatkich qayd etilgan.