Санкт-Петербургда мигрантларга тақиқ ортидан такси нархлари ошди

 “Фонтанка.ру” нашри маълумотларига кўра, журналистлар 6 ва 7 ноябр кунлари Санкт-Петербург бўйлаб “Яндекс Такси”нинг “Комфорт” тарифидаги сафарларни таққослашган. 7 ноябр — тақиқ кучга кирган куни — нархлар бир кун олдингидан 3,2 фоиздан 32,5 фоизгача қимматлашган.

Айрим фойдаланувчилар иловада шундай хабарни кўришган:

“Ҳайдовчилар етишмаяпти, таксини узоқроқ кутишга тўғри келади. Сафарларингизни эртароқ режалаштиринг. Жамоат транспортида тезроқ етиб боришингиз мумкин”.

“Яндекс Такси” маъмурияти маълум қилишича, янги чеклов туфайли Петербургдаги такси ҳайдовчилари сони 12 фоизга камайган, яъни 4 мингдан ортиқ киши ишсиз қолган. Экспертлар буни “енгиб бўлмас кадр танқислиги фонида яна бир зарба” сифатида баҳоламоқда.

Мигрантларнинг такси ва курьерлик соҳаларида ишлаши Санкт-Петербург губернатори Александр Бегловнинг август ойидаги қарори билан тақиқланган. Расмийлар буни:

• “норасмий бандликка қарши кураш”,
• “хизматлар соҳасида хавфсизликни ошириш”,
• “талабалар учун иш жойлари яратиш”
  деб изоҳлашган.

Эслатиб ўтамиз, 3 ноябрдан Санкт-Петербургда хорижий фуқаролар, асосан  Озарбойжон, Ўзбекистон, Тожикистон, Молдова ва Украина фуқароларининг курьерлик соҳасида ишлаши тақиқланганди.