АҚШ давлат котиби Марко Рубио Ўзбекистонга келади

Марко Рубио Самарқандда учрашувлар ўтказади

АҚШ Давлат котиби Марко Рубио 17–22 октябрь кунлари Ўзбекистон ва Ҳиндистонга ташриф буюради. Бу ҳақда АҚШ Давлат департаменти маълум қилган, деб ёзади Reuters.

Ташрифнинг Ўзбекистонга оид қисмида Рубио Самарқанд шаҳрида бўлади. У Ўзбекистон, Қозоғистон, Қирғизистон, Тожикистон ва Туркманистон вакиллари билан икки томонлама учрашувлар ҳамда музокараларда иштирок этади.

АҚШ Давлат департаменти маълумотига кўра, Америка делегацияси таркибида 200 нафардан ортиқ ишбилармон доиралар вакиллари ҳам бўлади. Бу ташрифда минтақавий иқтисодий алоқаларни ривожлантириш масалаларига ҳам эътибор қаратилишини кўрсатади.

Ҳиндистонда энергетика масаласи муҳокама қилинади

Ўзбекистондан кейин Марко Рубио Ҳиндистоннинг Мумбай ва Жамнагар шаҳарларига йўл олади. У ерда Ҳиндистон расмийлари билан минтақавий ва глобал вазият, шунингдек, энергетика соҳасидаги ҳамкорликни кенгайтириш имкониятлари муҳокама қилинади.

АҚШ ва Ҳиндистон ўртасидаги савдо келишуви бўйича музокаралар ҳам мураккаб кечмоқда. Томонлар ўртасида Россия энергетика ресурсларини харид қилиш билан боғлиқ масалалар юзасидан ҳам келишмовчиликлар мавжуд.

Муаллиф: Ҳасанбой ОЧУН