Уиткофф: АҚШ, Россия ва Украина вакиллари Абу-Дабида учрашади

10–11 ноябрь кунлари Москванинг Украинага қарши урушини тўхтатиш бўйича музокаралар ўтказиш учун АҚШ, Украина ва Россия делегациялари Абу-Дабида учрашиши режалаштирилмоқда. Бу ҳақда АҚШ махсус вакили Стив Уиткофф маълум қилди.

Уиткоффнинг айтишича, ушбу муҳокамалар «урушдан кейинги хавфсизлик келишувлари, кескинликни юмшатиш, гуманитар чоралар ҳамда урушга барҳам бериш» масалаларини қамраб олади.

Reuters агентлигининг юқори мартабали АҚШ мулозимига таяниб берган хабарига кўра, музокараларда АҚШ номидан Уиткофф ва Дональд Трампнинг куёви Жаред Кушнер иштирок этиши кутилмоқда.

Россия президенти Владимир Путин икки ҳафта муқаддам Санкт-Петербургда Уиткофф билан бўлиб ўтган учрашувдан сўнг уч томонлама музокараларнинг янги босқичини ўтказишга розилик берган.

Европа ва НАТО билан учрашув

Уиткофф ўз хабарида АҚШ музокарачилари шу ҳафта Брюсселда Буюк Британия, Франция, Германия, Европа Иттифоқи ва НАТО вакиллари билан учрашиб, «Украина учун хавфсизлик кафолатлари, Европанинг урушдан кейинги хавфсизлик архитектураси ҳамда Украинани қайта тиклашни қўллаб-қувватлашга доир иқтисодий имкониятлар»ни муҳокама қилишини ҳам таъкидлади.

«Биз келажак авлодлар учун мустаҳкам хавфсизликни таъминлайдиган кенг қамровли ва барқарор тинчлик битимига эришиш йўлида Киев, Осло ҳамда Санкт-Петербургда қўлга киритилган ютуқларни янада ривожлантиришни интиқлик билан кутмоқдамиз», – деди Стив Уиткофф.

Украина ва Россиянинг ҳар қандай эҳтимолий тинчлик келишуви шартлари бўйича қарашлари ҳамон бир-биридан анча узоқ. АҚШ воситачилигидаги сўнгги уч томонлама тинчлик музокаралари АҚШ ва Исроил Эронга қарши уруш бошлашидан аввал, февраль ойида бўлиб ўтганди.