Каннаваро: «Ёрдамчиларимга ойликни ўз чўнтагимдан тўлаяпман»

Унинг таъкидлашича, оммавий ахборот воситалари ва ижтимоий тармоқларда айтилаётганидек, у йилига 4 миллион евро маош олмайди.

«Яна бир бор айтаман, мен бунча пул олмайман. Яна кимдир нотўғри маълумот тарқатмоқда. Билмадим нега, балки хорижлик бўлганим учун мени чиқиштиришмаётгандир», — деди Каннаваро.

Бош мураббийнинг сўзларига кўра, у ўз штабига жалб қилган айрим мутахассисларга ойликни шахсий маблағлари ҳисобидан тўламоқда.

«Мен ўзим билан олиб келган мураббийларга ҳам чўнтагимдан ойлик тўлаяпман. Роландо Бьянки умуман текинга келиб Ўзбекистон терма жамоасида ишлашга рози бўлди», — деди у.

Каннаваронинг айтишича, агар келгусида яна қўшимча мураббийлар жалб этилса, бу уларнинг маошини Ўзбекистон футбол ассоциацияси тўлайди, дегани эмас.

«Агар биз яна мураббийлар олиб келаётган бўлсак, буларга ЎФА ойлик беради дегани эмас. Уларни ўзим ёнимдан пул бериб олиб келяпман», — дея қўшимча қилди бош мураббий.