Марадонанинг тўпи арзонга – 3,35 миллион долларга сотилди

Диего Марадона 1986 йилги Жаҳон чемпионатида Англияга қарши ўйинда машҳур “Худонинг қўли” голини урган футбол тўпи аукционда 3,35 миллион долларга (2,9 миллион евро) сотилди.

Якуний нарх савдо олдидан белгиланган 10 миллион долларлик (8,6 миллион евро) баҳодан анча паст бўлди.

Футбол тарихидаги энг баҳсли гол

2020 йилда вафот этган Марадона бу баҳсли голни Аргентинанинг Жаҳон чемпионати чорак финалида Англияга қарши ўтказилган ўйинида, Мехико шаҳридаги “Ацтека” стадионида урган.

Бу зарба дастлаб бош билан урилган голга ўхшаб кўринган. Бироқ секинлаштирилган видеоларда Марадона қўли билан тўпни Англия дарвозабони Питер Шилтон устидан ошириб юборгани акс этган.

Ўша пайтда тунислик ҳакам Али Бин Носир қўл билан ўйналганини пайқамади ва голни ҳисобга олди.

“Турнирдан олдин FIFA томонидан берилган кўрсатмаларга мувофиқ, голнинг ҳақиқийлигини тасдиқлаш учун қанот ҳакамимга қарадим. У голнинг тўғри киритилганига ишонч ҳосил қилиб, майдон марказига қайтди”, – деган Носир.

Марадона бу голни “бир оз Марадонанинг боши билан, бир оз Худонинг қўли билан” урилган деб таърифлаган. Кейинчалик у тўпни қўли билан атайлаб ўйнаганини тан олган ва бу голни 1982 йилги Фолкленд урушида ватани мағлубиятга учрагани учун Буюк Британиядан олинган “рамзий қасос” деб атаган.

“Аср голи”

“Худонинг қўли” голидан атиги тўрт дақиқа ўтиб, Марадона яна бир гол урган.

Тўпни ўз майдонининг ярмида қабул қилиб олган Марадона деярли бутун Англия жамоаси футболчиларини алдаб ўтиб, уни дарвозага йўллади. Кейинчалик бу гол FIFA томонидан “Аср голи” деб топилди.

Аргентина ўйинда 2:1 ҳисобида ғалаба қозонди.

Рекорд янгиланмади

Adidas Azteca тўпи илк бор 2022 йилда аукционга қўйилган. Ўшанда таклифлар 2,37 миллион долларга (2 миллион евро) етган, бироқ белгиланган минимал нархга эришилмаган.

Кейинчалик 2023 йилда яна аукционга қўйилди, аммо ўшанда ҳам сотилмади.

Сўнгги савдода тўланган нарх эса энг қиммат сотилган спорт тўпи рекордини ҳам янгилай олмади.

Бу рекорд ҳозирда “Лос-Анжелес Доджерс” суперюлдузи Шоҳей Отани­нинг 50-хоум-ран тўпига тегишли бўлиб, у 2025-йилда 4,39 миллион долларга (3,8 миллион евро) сотилган.