Эркинжон Турдимов Таълим ва илм-фан вазири этиб тайинланди

Ўзбекистон Президентининг тегишли фармони билан Эркинжон Оқбутаевич Турдимов янги лавозимга тайинланди. Бу ҳақда Президент матбуот котиби Шерзод Асадов маълум қилди.

Тайинловдан аввал унинг номзоди Олий Мажлис Қонунчилик палатаси депутатлари томонидан маъқулланган эди.

Янги лавозим Вазирлар Маҳкамасининг ижро этувчи тузилмасига киритилди. Шунингдек, таълим, илм-фан ва соғлиқни сақлаш масалалари бўйича котибият ташкил этилди.

Янги лавозимнинг ваколатлари

Фармонга мувофиқ, Бош вазирнинг биринчи ўринбосари — таълим ва илм-фан вазири ўз ваколатлари доирасида таълим, илм-фан ва соғлиқни сақлаш соҳаларидаги вазифалар ижроси бўйича вазирликлар, қўмиталар, агентликлар ва инспекциялар раҳбарлари фаолиятига умумий раҳбарлик қилади ҳамда уларнинг ишини мувофиқлаштиради.

Бу вазифалар Қорақалпоғистон Республикаси Вазирлар Кенгаши Раиси, вилоятлар ҳокимлари ва Тошкент шаҳри ҳокимининг тегишли соҳалардаги фаолиятини мувофиқлаштиришни ҳам қамраб олади.

Мазкур йўналишлардаги ислоҳотларни ташкил этиш ва уларнинг амалга оширилишини назорат қилиш Ўзбекистон Президенти Администрацияси раҳбари Саида Мирзиёева зиммасига юклатилган.

Таълим соҳасидаги ташкилий ўзгаришлар

2026 йил 3 октябрдаги Президент фармони билан Мактабгача ва мактаб таълими вазирлиги ҳамда Олий таълим, фан ва инновациялар вазирлиги негизида ягона Таълим ва илм-фан вазирлигини ташкил этиш белгиланди.

Ушбу ислоҳот таълимнинг турли босқичлари ва илм-фан соҳасини ягона тизим асосида ривожлантириш, таълим сифати ва самарадорлигини ошириш ҳамда инсон капиталини ривожлантиришга қаратилган.

Янги вазирлик мактабгача, умумий ўрта, профессионал ва олий таълим муассасалари фаолиятини ташкил этиш, таълим жараёнларига қўйиладиган талабларни белгилаш, шунингдек, таълим муассасаларини аккредитациядан ўтказиш ва лицензиялаш билан боғлиқ вазифаларни амалга ошириши кўзда тутилган.

Эркинжон Турдимовнинг меҳнат фаолияти

Эркинжон Турдимов 1969 йилда Самарқанд вилоятининг Қўшработ туманида туғилган. У 1991 йилда Тошкент халқ хўжалиги институтини иқтисодчи мутахассислиги бўйича тамомлаган.

У меҳнат фаолиятини 1991 йилда банк соҳасида бошлаган. 1995–1996 йилларда Зарафшон шаҳри ҳокимининг иқтисодий масалалар бўйича ўринбосари бўлиб ишлаган. 1996–2000 йилларда эса Миллий банкнинг Навоий вилояти филиалига раҳбарлик қилган.

2000–2008 йилларда Хатирчи тумани ҳокими лавозимида фаолият юритган. 2008 йилда қишлоқ хўжалиги ва сув хўжалиги вазирининг биринчи ўринбосари бўлган.

Кейинги йилларда у бир қатор ҳудудларга раҳбарлик қилган. 2008–2016 йилларда Навоий вилояти, 2016–2018 йилларда Сурхондарё вилояти ҳокими бўлган. 2018 йилдан 2024 йил ноябрига қадар Самарқанд вилоятини бошқарган.

2025 йил январидан янги тайинловга қадар Сирдарё вилояти ҳокими лавозимида ишлаган.

Эркинжон Турдимовнинг Бош вазир биринчи ўринбосари ва таълим ва илм-фан вазири этиб тайинланиши таълим, илм-фан ва соғлиқни сақлаш соҳаларидаги бошқарув тизими қайта ташкил этилаётган даврга тўғри келди.

Муаллиф: Ҳасанбой ОЧУН