SAT сертификатини ноқонуний олиб бериш билан шуғулланган талабалар аниқланди

Тошкент вилоятида фуқароларга олий таълимга киришда фойдаланиладиган халқаро SAT сертификатини ноқонуний тарзда олиб бериш билан шуғулланган гуруҳ фаолиятига чек қўйилди. Ҳолат юзасидан жиноят иши қўзғатилиб, терговхаракатлари олиб борилмоқда.

ДХХ Тошкент вилояти бўйича бошқармаси ҳамда вилоят ИИББ ходимлари ҳамкорлигида ўтказилган тезкор тадбирда халқаро SAT сертификатини ноқонуний тарзда олиб бериш билан шуғулланган гуруҳ фаолияти аниқланган.

Маълум қилинишича, гуруҳ аъзоларининг аксарияти Европадаги нуфузли университетнинг Тошкент шаҳридаги филиали талабалари бўлган. Яна бир иштирокчи Осиёдаги етакчи давлатлардан биридаги олий таълим муассасасининг пойтахтимиздаги филиалида таҳсил олган.

Улар Янгиҳаёт туманидаги хусусий мактаб биносида "бункер" ташкил қилган. IT соҳасига ихтисослашган МЧЖ мутахассиси эса яширин равишда тизимга кириб, тест саволларини ишлаш имкониятини яратган.

Шундан сўнг талабалар масофадан туриб, SAT имтиҳонида қатнашаётган талабгорлар ўрнига тест саволларини ечиш билан шуғулланган.

Шунингдек, гуруҳ аъзоларидан бири SAT сертификатини олмоқчи бўлган 5 нафар фуқародан ҳар бирига 1,5 минг АҚШ доллардидан талаб қилган. Улардан бирининг пул маблағи криптоҳамён орқали олингани ҳам аниқланган.

Ҳозирда ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилган. Тергов ҳаракатлари давом этмоқда.