Феруза Норматовага нисбатан жиноят иши қўзғатилди

Тошкент шаҳрининг Миробод туманида блогер Феруза Норматовага нисбатан Жиноят кодексининг 140-моддаси иккинчи қисми билан жиноят иши қўзғатилди. У ижтимоий тармоқдаги саҳифасида ўзига мутлақо бегона қизнинг суратини унинг розилигисиз жойлаштириб, унга нисбатан асоссиз айбловлар билдирганликда гумон қилинмоқда.

Миробод туманида яшовчи фуқаро ички ишлар органларига мурожаат қилиб, ижтимоий тармоқда унинг суратидан рухсациз фойдаланилгани ва бу орқали шаъни ҳамда қадр-қимматига путур етказилганини билдирган.

Қиз ўзига қўйилган айбловларни рад этди

Фуқаронинг айтишича, ижтимоий тармоқда тарқалган видео миллионлаб одамлар томонидан кўрилганидан кейин у ҳатто уйига боришда ҳам қийинчиликларга дуч келган. У ўзига нисбатан билдирилган айбловларни рад этиб, видеода тилга олинган эркакни танимаслигини маълум қилган.

“Шунақа туҳмат билан уйимга бора олмаяпман. Эри билан ҳеч қандай алоқам йўқ, кўрмаганман, билмайман, танимайман. Қонуний чора кўрилишини сўрайман. Бу нарса қолган блогерларга сабоқ бўлсин, одамнинг шаъни ва қадр-қиммати билан ўйнашмасин”, деган фуқаро.

Блогер изоҳи

Ҳолатга ойдинлик киритиш мақсадида ижтимоий тармоқдаги саҳифа эгасидан изоҳ сўралган. Терговга қадар текширув давомида Феруза Норматова суратдаги қизни умуман танимаслигини билдирган.

Унинг айтишича, суратни жойлаштиришдан мақсад пиар қилиш ва обуначилар сонини ошириш бўлган.

Жиноят иши қўзғатилди

Мазкур ҳолат юзасидан Миробод тумани ички ишлар органлари томонидан Ўзбекистон Республикаси Жиноят кодексининг 140-моддаси иккинчи қисми билан жиноят иши қўзғатилган.

Ҳозирча тақдим этилган маълумотларда иш бўйича терговнинг якуний натижалари келтирилмаган. Жиноят иши қўзғатилгани шахснинг айби суд томонидан исботланганини англатмайди.