Транс-Афғон йўлаги масаласини ҳал этиш учун уч мамлакат вакиллари Кобулда учрашди

Ўзбекистон Ташқи ишлар вазири Бахтиёр Саидов Афғонистон Бош вазири вазифасини бажарувчи Мулла Муҳаммад Охун билан учрашди.

Саидовнинг айтишича, Ўзбекистон қўшни Афғонистон билан ўзаро муносабатларни янада чуқурлаштиришга интилмоқда.

"Учрашувимиз давомида савдо, гуманитар ҳамкорлик ва минтақавий боғлиқликни ривожлантириш, жумладан, "Ўзбекистон - Афғонистон - Покистон" темир йўли бўйича ҳадли битимни муҳокама қилдик. Бу минтақавий интеграция йўлидаги муҳим қадамдир", — деган Бахтиёр Саидов.

Ўзбекистон Афғонистонни доим беқарорлик ўчоғи эмас, балки Марказий Осиёнинг ажралмас қисми сифатида кўриб келган. 2011 йилдан бери фаолият юритиб келаётган Термиз – Мозори Шариф темирйўли расмий Тошкентнинг аниқ режалаштирилган инфратузилма стратегиясининг амалий самарадорлигини яққол намоён этди. 2019 йилдан бошлаб Мозори Шариф – Кобул – Пешовар темирйўл лойиҳаси Покистон томонидан сиёсий қўллаб-қувватлангач, жараён ортга қайтмас, стратегик ривожланиш босқичига ўтди.

Бу янги фаза айнан Президент Шавкат Мирзиёевнинг ташаббуси туфайли рўёбга чиқмоқда. Унинг етакчилигида Тошкент нафақат Евросиё транзит юраги сифатида ўз позициясини тиклади, балки ўзаро иқтисодий манфаатлар ва прагматик ёндашув асосида минтақавий барқарорлик моделини шакллантирмоқда.

Шимолдаги савдо йўллар долзарблигини йўқотаётган, Каспий – Эрон йўналиши эса қўшимча сармояларни талаб қилаётган шароитда, Транс-Афғон коридори бутун Марказий Осиё учун геоиқтисодий таянч нуқтасига айланмоқда. Бу фақат юк ташиш лойиҳаси эмас. Темирйўл орқали электр энергиясини экспорт қилиш, CASA-1000 лойиҳасини амалга ошириш, Гвадар ва Карачи портларига чиқиш ҳамда Форс кўрфази мамлакатлари билан энергетика алоқаларини йўлга қўйиш имконияти пайдо бўлади. Шу сабабли, бу йўналиш бир нечта муҳим манфаатларни бир жойда бирлаштирадиган марказга айланмоқда. Шу нуқтаи назардан Кобулда имзоланган ҳужжат – оддий инфратузилма битими эмас, балки узоқни кўзлаган сиёсий танловнинг ифодасидир.

Умуман олганда, Кобулда бугун минтақавий ҳамкорликнинг янги босқичи бошланди. Энди давлатлар йўллар учун рақобатлашмаяпти, балки манфаатларни бирлаштиряпти. Ўзбекистон эса бу жараёнда оддий транзит ҳудуди эмас, балки асосий йўналишлар ва мазмунни белгиловчи муҳим иштирокчига айланмоқда.

Жорий йилнинг 4 июль куни Россия Федерацияси дунёмамлакатларидан биринчи бўлиб, Афғонистонда Толибон ҳукумати, яъни Афғонистон Ислом амирлигини ҳукумат сифатида тан олди.

Эслатиб ўтамиз, аввалроқ PARADIGMA.UZ сўнги вақтларда юзага келаётган сиёсий ва иқтисодий урушлар фонидан Ўзбекистон учун қайси йўлак муҳим эканлиги ҳақида сиёсий таҳлилчи Наргиза Умарова билан суҳбатлашган эдик.