Trans-Afgʻon yoʻlagi masalasini hal etish uchun uch mamlakat vakillari Kobulda uchrashishdi

Oʻzbekiston Tashqi ishlar vaziri Baxtiyor Saidov Afgʻoniston Bosh vaziri vazifasini bajaruvchi Mulla Muhammad Oxun bilan uchrashdi.

Saidovning aytishicha, Oʻzbekiston qoʻshni Afgʻoniston bilan oʻzaro munosabatlarni yanada chuqurlashtirishga intilmoqda.

"Uchrashuvimiz davomida savdo, gumanitar hamkorlik va mintaqaviy bogʻliqlikni rivojlantirish, jumladan, "Oʻzbekiston - Afgʻoniston - Pokiston" temir yoʻli boʻyicha hadli bitimni muhokama qildik. Bu mintaqaviy integratsiya yoʻlidagi muhim qadamdir", — degan Baxtiyor Saidov.

Oʻzbekiston Afgʻonistonni doim beqarorlik oʻchogʻi emas, balki Markaziy Osiyoning ajralmas qismi sifatida koʻrib kelgan. 2011 yildan beri faoliyat yuritib kelayotgan Termiz – Mozori Sharif temiryoʻli rasmiy Toshkentning aniq rejalashtirilgan infratuzilma strategiyasining amaliy samaradorligini yaqqol namoyon etdi. 2019 yildan boshlab Mozori Sharif – Kobul – Peshovar temiryoʻl loyihasi Pokiston tomonidan siyosiy qoʻllab-quvvatlangach, jarayon ortga qaytmas, strategik rivojlanish bosqichiga oʻtdi.

Bu yangi faza aynan Prezident Shavkat Mirziyoyevning tashabbusi tufayli roʻyobga chiqmoqda. Uning yetakchiligida Toshkent nafaqat Yevrosiyo tranzit yuragi sifatida oʻz pozitsiyasini tikladi, balki oʻzaro iqtisodiy manfaatlar va pragmatik yondashuv asosida mintaqaviy barqarorlik modelini shakllantirmoqda.

Shimoldagi savdo yoʻllar dolzarbligini yoʻqotayotgan, Kaspiy – Eron yoʻnalishi esa qoʻshimcha sarmoyalarni talab qilayotgan sharoitda, Trans-Afgʻon koridori butun Markaziy Osiyo uchun geoiqtisodiy tayanch nuqtasiga aylanmoqda. Bu faqat yuk tashish loyihasi emas. Temiryoʻl orqali elektr energiyasini eksport qilish, CASA-1000 loyihasini amalga oshirish, Gvadar va Karachi portlariga chiqish hamda Fors koʻrfazi mamlakatlari bilan energetika aloqalarini yoʻlga qoʻyish imkoniyati paydo boʻladi. Shu sababli, bu yoʻnalish bir nechta muhim manfaatlarni bir joyda birlashtiradigan markazga aylanmoqda. Shu nuqtai nazardan Kobulda imzolangan hujjat – oddiy infratuzilma bitimi emas, balki uzoqni koʻzlagan siyosiy tanlovning ifodasidir.

Umuman olganda, Kobulda bugun mintaqaviy hamkorlikning yangi bosqichi boshlandi. Endi davlatlar yoʻllar uchun raqobatlashmayapti, balki manfaatlarni birlashtiryapti. Oʻzbekiston esa bu jarayonda oddiy tranzit hududi emas, balki asosiy yoʻnalishlar va mazmunni belgilovchi muhim ishtirokchiga aylanmoqda.

Joriy yilning 4 iyul kuni Rossiya Federatsiyasi dunyomamlakatlaridan birinchi boʻlib, Afgʻonistonda Tolibon hukumati, yaʼni Afgʻoniston Islom amirligini hukumat sifatida tan oldi.

Eslatib oʻtamiz, avvalroq PARADIGMA.UZ soʻngi vaqtlarda yuzaga kelayotgan siyosiy va iqtisodiy urushlar fonidan Oʻzbekiston uchun qaysi yoʻlak muhim ekanligi haqida siyosiy tahlilchi Nargiza Umarova bilan suhbatlashgan edik.