Ноқонуний босмахона: диний адабиётлар чоп этиш тўхтатилди

Давлат хавфсизлик хизматининг Фарғона вилояти бўйича бошқармаси вилоят ИИБ билан ҳамкорликда ўтказган тезкор тадбирларда диний мазмундаги контрафакт китобларни ноқонуний чоп этиш ва тарқатиш ҳолатлари аниқланди.

Маълум қилинишича, Бувайда туманида яшовчи, 1986 йилда туғилган фуқаро қариндошлари билан биргаликда тегишли лицензия ва рухсатномаларсиз диний мазмундаги китобларни чоп этиш билан шуғулланган.

Тезкор тадбир давомида ушбу манзилдан 17 579 дона тайёр ва 500 килограммдан ортиқ ярим тайёр контрафакт китоб, шунингдек, тўртта босма ва елимлаш ускунаси ашёвий далил сифатида олинган. Бундан ташқари, 216 минг дона пиротехника воситаси ҳам мусодара қилинган.

Шунга ўхшаш ҳолат Тошкент шаҳрининг Янгиҳаёт туманида ҳам аниқланган. У ерда 1981 йилда туғилган фуқарога тегишли ноқонуний босмахонадан 8,5 мингдан ортиқ контрафакт диний адабиёт процессуал тартибда расмийлаштириб олинган.

Ҳар икки ҳолат юзасидан ҳозирда суриштирув ишлари олиб борилмоқда.