Бухорода маст ҳайдовчи 40 нафар болани автобусда олиб кетгани аниқланди

Ҳайдовчи ЙПХ талабига ҳам бўйсунмаган

Маълум қилинишича, 2026 йил 28 апрель куни йўл-патруль хизмати ходимлари томонидан Isuzu русумли йўловчи ташувчи транспорт воситаси тўхтатиб текширилган. Текширув жараёнида ҳайдовчи маст ҳолатда экани маълум бўлган.

Шунингдек, у йўл-патруль хизмати ходимларининг қонуний талабларини ҳам бажармаган.

Суд ҳайдовчига жазо тайинлади

Суд қарорига кўра, ҳайдовчига Маъмурий жавобгарлик тўғрисидаги кодекснинг 131-моддаси 1-қисми, 194-моддаси 1-қисми ҳамда 128-прим 8-моддаси биринчи қисми асосида жазо тайинланган.

У 3 йил муддатга барча турдаги автотранспорт воситаларини бошқариш ҳуқуқидан маҳрум қилинди. Шунингдек, БҲМнинг 40 баравари миқдорида — 16 миллион 480 минг сўм жарима солинган.

Ҳайдовчи қилмишидан пушаймон

Ҳайдовчи суддан сўнг ўз ҳаракатларини нотўғри деб баҳолаганини билдирган.

“Ўз хатти-ҳаракатларимни тўғри баҳолаб, қоидабузарлик учун афсусдаман. Йўл ҳаракати хавфсизлиги жамият учун муҳим эканини тўлиқ тушунаман ва келгусида бундай ҳолатга йўл қўймасликка қатъиян ваъда бераман”, — деган у.