Суд қарорисиз 48 соатдан ортиқ маъмурий ушлаб туриш мумкин эмас

Ўзбекистон Республикаси Конституциявий суди Маъмурий жавобгарлик тўғрисидаги кодекснинг шахсларни 48 соатдан ортиқ маъмурий тартибда ушлаб туриш имконини берувчи нормасини кўриб чиқди. Бу ҳақда Ўзбекистон Республикаси Конституциявий судининг матбуот хизмати хабар берди.

Суд МЖтКнинг 288-моддаси иккинчи қисмида назарда тутилган айрим ҳолатларда шахсни уч суткагача, шахсни тасдиқловчи ҳужжати бўлмаган тақдирда эса прокурор санкцияси билан ўн суткагача ушлаб туриш тартиби Конституцияга мувофиқ эмас, деган хулосага келди.

Конституциянинг 27-моддасига кўра, шахс суд қарорисиз 48 соатдан ортиқ муддат ушлаб турилиши мумкин эмас. Конституциявий суд прокурорнинг хабардор қилиниши ёки санкцияси суд қарорининг ўрнини босмаслигини таъкидлади.

Қарор шахс эркинлиги ва шахсий дахлсизлигини таъминлаш ҳамда маъмурий ушлаб туриш институтини Конституция талабларига мувофиқлаштиришга қаратилган.

Муаллиф: Ҳасанбой ОЧУН