Экстремистик ташкилотларда иштирок этганлик учун 10 йилгача қамоқ жазоси белгиланди

Ўзбекистонда экстремизмга қарши курашишга оид қонунчиликка ўзгартиришлар киритилди. Янги тартибга кўра, экстремистик, сепаратистик, фундаменталистик ёки бошқа тақиқланган ташкилотлар фаолиятида иштирок этган шахслар беш йилдан ўн йилгача озодликдан маҳрум қилиниши мумкин.

Мазкур нормалар 2026 йил 2 ноябрда қабул қилинган «Экстремизмга қарши курашиш самарадорлигини оширишга қаратилган айрим қонун ҳужжатларига ўзгартириш ва қўшимчалар киритиш тўғрисида»ги қонунда назарда тутилган.

Материаллар ва рамзлар учун ҳам жавобгарлик бор

Қонун билан Маъмурий жавобгарлик тўғрисидаги кодексга ҳам янги қоидалар киритилди.
Унга мувофиқ, экстремизм, сепаратизм ёки ақидапарастлик ғояларини тарғиб қилувчи, қирғинга ёки фуқароларни мажбуран кўчиришга чақирувчи, шунингдек, аҳоли орасида ваҳима келтириб чиқаришга қаратилган материалларни тайёрлаш ёки тарқатиш мақсадида сақлаш ҳуқуқбузарлик ҳисобланади.

Экстремистик ва террорчилик ташкилотларининг атрибутлари ҳамда рамзий белгиларини тарқатиш ёки намойиш этиш мақсадида тайёрлаш ва сақлаш ҳам маъмурий жавобгарликка сабаб бўлади.

Бундай ҳолатларда ҳуқуқбузарлик предмети мусодара қилиниши билан бирга:

фуқароларга базавий ҳисоблаш миқдорининг 50 бараваридан 100 бараваригача;
мансабдор шахсларга эса 100 бараваридан 150 бараваригача жарима қўлланилиши мумкин.

Шунингдек, ҳуқуқбузарларга 15 суткагача маъмурий қамоқ жазоси тайинланиши ҳам назарда тутилган.

Қонунчиликдаги атама ҳам ўзгарди

Ўзгартишлардан яна бири ҳуқуқий ҳужжатлардаги «диний экстремизм» ибораси билан боғлиқ. Энди ушбу атама ўрнига «экстремизм» сўзи қўлланилади.

Янги қонун ЎРҚ-1185-сон билан расмийлаштирилган.