Қурбон ҳайити муносабати билан эҳтиёжманд оилаларга моддий ёрдам ажратилади

Президент Шавкат Мирзиёев топшириғига мувофиқ, Қурбон ҳайити муносабати билан аҳолининг эҳтиёжманд қатламларини қўллаб-қувватлаш, бемор болаларни даволаш ва ижтимоий объектларни обод қилиш учун йирик маблағ ажратилади.

Жумладан, оғир ва ногиронликка олиб келувчи касалликларга чалинган 10 минг нафар болада жарроҳлик амалиётлари ўтказилади. Шунингдек, 2,3 минг нафар онкологик, гематологик ва онкогематологик ташхис қўйилган беморларни текшириш, даволаш ва операция қилиш харажатлари қоплаб берилади.

Камида 350 нафар беморда жигар ва буйрак трансплантацияси амалиётлари ҳам давлат томонидан молиялаштирилади.

Бундан ташқари, 8 минг нафардан зиёд етим ва ота-она қарамоғидан маҳрум бўлган болалар, шунингдек, Ватан ҳимояси йўлида ҳалок бўлган ҳарбийларнинг фарзандлари номига очилган омонат ҳисобварақларига 200 доллардан пул ўтказилади.

Ҳудудлардаги 500 та масжидда аҳоли учун замонавий таҳоратхоналар қуриш, реконструкция қилиш ва таъмирлаш ишлари ҳам режалаштирилган. Шу билан бирга, қабристонларни ободонлаштириш ишлари амалга оширилади.

Шунингдек, давлат таъминотидаги оилалар, ёлғиз кексалар, ногиронлиги бўлган шахслар ва ўзгалар парваришига муҳтож инсонларга озиқ-овқат тўпламлари тарқатилади.

Ушбу чора-тадбирлар Қурбон ҳайити арафасида аҳолини қўллаб-қувватлаш ва ижтимоий ҳимояни кучайтиришга қаратилган.