Toshkentda ekologik vaziyatni yaxshilash boʻyicha maxsus komissiya tuzildi

 Bu haqda Prezident matbuot xizmati xabar berdi.

24 noyabr kuni Prezident administratsiyasi rahbari Saida Mirziyoyeva Toshkentdagi ekologik vaziyatni yaxshilash boʻyicha kechiktirib boʻlmaydigan choralarni muhokama etish maqsadida yigʻilish oʻtkazgandi. Unda ekspertlar xulosalari asosida yaqin, oʻrta va uzoq muddatli istiqbolni oʻz ichiga olgan kompleks takliflar ishlab chiqildi. Ular tezkor choralardan tortib, kelgusida bunday holatlar takrorlanishining oldini oluvchi tizimli yechimlarni qamrab oladi.

Yigʻilishda ekologik nazoratni kuchaytirish, ifloslantiruvchi obʼektlar faoliyatini cheklash, qurilish jarayonlariga qoʻyiladigan talablarni qatʼiylashtirish, shaharni keng koʻlamda koʻkalamzorlashtirish hamda havo sifatini nazorat qilishning zamonaviy tizimini yaratish boʻyicha vazifalar belgilandi.

Ekologik chora-tadbirlar kelgusida Prezidentga koʻrib chiqish uchun taqdim etiladigan farmon loyihasining asosi boʻlishi taʼkidlandi.

Ekologiya va atrof-muhitni muhofaza qilish qoʻmitasi raisi Xayrulla Gʻafforov taʼkidlashicha, havo sifati muammosi uzoq yillik jarayon natijasi boʻlib, uch asosiy omil bilan bogʻliq:

1. Iqlim oʻzgarishi va kam yogʻingarchilik. Orol dengizining qurishi va suv resurslari kamayishi natijasida arid muhit shakllangan, bu esa chang miqdorining ortishiga olib kelgan.
2. Issiqlik manbalari va sanoat korxonalari. Isitish tizimlari, issiqlik markazlari, IESlar va boshqa korxonalar havoga issiqxona gazlarini chiqarmoqda. Shamolning sustligi va atmosfera bosimi ularning jamlanib qolishiga sabab boʻlmoqda.
3. Transport vositalari. Transportdan chiqadigan zararli moddalar, ayniqsa yoz oylaridagi yashil maskanlar kamayganida, havoda koʻp miqdorda saqlanib qolmoqda. Daraxtlar barg toʻkishi, shamol va yogʻingarchilikning yetishmasligi chang va zararli moddalarni atmosferada ushlab turmoqda.