Украинада жанг қилган ўзбекистонлик 2 йилга қамалди

Суд ҳужжатларига кўра, айбланувчи 2023 йил сентябрь ойида Россияга ишлаш мақсадида борган. Бироқ у ерда гиёҳванд моддалар савдоси билан боғлиқ айблов билан қўлга олиниб, 8 йилга қамалган.

Жазони ўташ давомида унга Россия Қуролли Кучлари сафига қўшилиш таклиф қилинган. Дастлаб рад этган бўлса-да, кейинчалик босим остида рози бўлган ва 2025 йил август ойида шартнома имзолаган.

Маълумотларга кўра, у Донецк вилоятида ҳарбий тайёргарликдан ўтиб, жанговар ҳаракатларда қатнашган. Кейинчалик учувчисиз учиш аппарати ҳужуми натижасида жароҳат олган. Тиббий хулосада курак суяги синиши ва юз-кўз қисмида жароҳатлар қайд этилган.

Шундан сўнг у шифохонани тарк этиб, Ўзбекистоннинг Москвадаги элчихонасига мурожаат қилган.

Суд жараёнида айбланувчи ўз айбини тан олган ва мажбурлаш остида ҳаракат қилганини билдирган. Суд уни Ўзбекистон Республикаси Жиноят кодекси 154-модда билан айбдор деб топиб, 2 йиллик қамоқ жазосини тайинлади.