Фориш туманидаги боғчаларда 37 нафар бола овқатдан заҳарланди

Жиззах вилояти Фориш туманидаги тўртта давлат боғчасида 37 нафар бола овқатдан заҳарланди. Маълум бўлишича, улар бир кун олдин биокефир, пишлоқ, сарёғ каби маҳсулотларни истеъмол қилган. Вилоят СЕС хизматига кўра, озиқ-овқат маҳсулотларини ташиш, сақлаш нормалари бузилган. Ҳозирда ҳолат бўйича жиноий иш очилиб, суриштирув олиб борилмоқда.

Ўзбекистон

10.10.2025, 11:05

Lotinchada На русском языке

Улашиш:

Forish tumanidagi bogʻchalarda 37 nafar bola ovqatdan zaharlandi

Қайд этилишича, 9 октябрь куни 9:00 дан 16:00 га қадар 1,3,5 ва 7-сонли мактабгача таълим муфассалларининг жами 37 нафар нафар тарбияланувчиси иситма кўтарилиши, кўнгил айниши, қорин оғриғи, ич кетиш ва ҳолсизлик каби шикоятлари билан туман тиббиёт бирлашмасига мурожаат қилган. Улар 3 ёшдан 7 ёшгача бўлган.

Жиззах вилояти санитария эпидемиологик осойишталик ва жамоат саломатлиги бошқармасининг дастлабки хулосасига кўра, ушбу боғчаларда оммавий заҳарланиш юзага келишида озиқ-овқат маҳсулотларини ташиш, сақлаш, ишлов бериш жараёнларидаги санитария қоида ва нормаларининг бузилиши ҳолатлари мавжудлиги сабаб бўлган. Бу инсон организмида ошқозон ичак ҳазм қилиш тизимининг бузилишига олиб келиши мумкинлиги аниқланган.

Ҳолат юзасидан Фориш туман прокуратураси томонидан Жиноят кодексининг 205-моддаси 1-қисми (Ҳокимият ёки мансаб ваколатини суиистеъмол қилиш) билан жиноят иши қўзғатилиб, суриштирув ишлари олиб борилмоқда, дейилади хабарда.

Эслатиб ўтамиз, аввалроқ Тошкент вилоятининг Бўка, Пискент, Оққўрғон ва Қуйи Чирчиқ туманларида жами 1922 нафар бола овқатдан заҳарлангани ҳақида хабар берган эдик. Вилоят ҳокими Зоир Мирзаевга кўра, ўша вақтда болаларни даволаш учун 5-6 миллиард сўмлик дори-дармонлар шифохоналарга етказиб берилган.

Ўзбекистон

10.10.2025, 11:05

Улашиш: