Трамп: Эрон билан келишув сайловдан кейин тузилади

Президентнинг таъкидлашича, бу келишув Конгресс учун оралиқ сайловлардан кейин тузилиши мумкин.

«Менимча, биз сайловлардан кейин дарҳол келишувга эришамиз», — деди Трамп.

Нью-Йоркда АҚШ ва Эрон вакиллари ўртасида бир неча ойлик танаффусдан кейин музокаралар бўлиб ўтди. АҚШ томонидан Трампнинг махсус вакиллари Стив Уиткофф ва Жаред Кушнер, Эрон томонидан эса ташқи ишлар вазири Аббос Арақчи иштирок этган. Музокаралар воситачилар орқали олиб борилган. 

Уиткофф кейинчалик ижтимоий тармоқда музокаралар бир неча соат давом этганини ва воситачилар икки томон ўртасида мулоқотни таъминлаганини маълум қилди.

Трамп БМТ минбарида Эрон билан келишувга эришиш ёки унга қарши ҳарбий ҳаракатларни давом эттириш масаласида муҳим қарор қабул қилиши кераклигини айтди. У АҚШ Эроннинг ядровий қуролга эга бўлишининг олдини олганини таъкидлади. Бу баёнотлар Теҳрон билан дипломатик келишувга эришиш ҳақидаги фикрлар билан бир вақтда янгради. 

Трамп аввалроқ Эронга ядровий дастурини қисқартириш ва терроризмни қўллаб-қувватлашни тўхтатиш эвазига иқтисодий ҳамкорлик таклиф қилинганини айтди. Унинг сўзларига кўра, Теҳрон бу таклифни қабул қилмаган.

Айни пайтда Эрон томони АҚШ билан музокараларга тайёр эканини билдирган. Теҳрон, хусусан, АҚШнинг ҳарбий босими ва Эрон портларига нисбатан блокада чораларини юмшатиш масаласини кўтармоқда.