Afgʻonistonda birinchi oʻzbek milliy taomlari restorani ochildi

Agentlikka koʻra, Kobul shahrida ikki mingdan ortiq turli restoran, kafe va fast-fud shoxobchalari faoliyat yuritadi. Biroq Oʻzbekiston milliy taomlari restoranlari boʻlmagan.

Mazkur tamaddixona Oʻzbekiston elchixonasi koʻmagida tadbirkor vatandoshimiz Dilfuza Boqiyeva va uning Afgʻoniston fuqarosi boʻlgan turmush oʻrtogʻi tomonidan tashkil etildi.

“Eʼtiborli jihati, oʻzbek milliy taomlari restoranini qurish va bezatish uchun barcha zaruriy ashyolar Oʻzbekistondan keltirildi. Bino old tomoniga "Oʻzbek milliy taomlari" yozuvi tushirilgan. Kafe intereri oʻzbek milliy matosi – adras bilan bezatilgan boʻlib, bu mijozlarning hayratiga sabab boʻlmoqda”, — deyiladi xabarda.   

Ushbu muassasaning tantanali ochilish marosimida Afgʻoniston poytaxtida yashovchi oʻzbek jamoatchiligi vakillari qatnashdi.

Ochilish marosimida soʻz olgan afgʻon tomoni bu voqeani yuqori baholadilar va Afgʻoniston bilan siyosiy, iqtisodiy aloqalar rivojlanishida koʻplab tashabbuslarni ilgari surayotgan Oʻzbekiston, Prezidentiga minnatdorlik bildirdilar.