Isroil erta tongda Eronning Qum shahriga hujum qildi

Qayd etilishicha, binoning toʻrtinchi qavatiga tushgan zarba Isroil mudofaa kuchlari Eronda yangi hujumlar toʻlqini boshlaganini aytganidan koʻp vaqt oʻtmay sodir boʻldi.

BBC nashrining yozishicha, Muqaddas Qum viloyatida Eronning eng yirik va xavfsiz yadroviy infratuzilma obʼektlaridan biri "Fordo" joylashgan. Yadroviy tadqiqot majmuasi joylashgan Isfahonda ham portlash ovozlari eshitilgan.

Qum viloyati maʼmuriyati matbuot kotibi Morteza Haydariyning Eron matbuotiga bergan bayonotiga koʻra, 16 yoshli yigit halok boʻlgan.

"Jerusalem Post" nashrining yozishicha, jabrlanganlardan kamida bittasi Eron yadro dasturida ishlagani taxmin qilinmoqda.

CNN tomonidan geolokatsiyalangan videoda Qum janubi-gʻarbidagi binoga zarba berilgani koʻrsatilgan. Videoda koʻp qavatli uyning yuqori qavatlarida yongʻin yonayotganini koʻrish mumkin.

Ayni paytda yarim rasmiy Nour News xabar berishicha, shimoldan 130 kilometr (80 milya) uzoqlikdagi poytaxt Tehron ustida havo hujumidan mudofaa kuchlari faollashgan.

Nashrlarning yozishicha, hujumning yangi toʻlqinini Eron boshlab bergan. Eron tomonidan Isroil tarafga uchirilgan raketalar urib tushirilgan, biroq bir qancha baland binolar va koʻp qavatli turar-joylarda yongʻin kelib chiqqan. Isroil rasmiylari hujum oqibatida yaralangan va halok boʻlganlar yoʻqligini aytmoqda.

Eslatib otamiz, Isroil Bosh vaziri Binyamin Netanyaxu Eronning "Fordo" yadro dasturiga hujum qilish uchun AQShdan yer osti obʼektlarga zarba berish uchun moʻljallangan raketa va harbiy samolyotlar soʻragan edi. Shundan soʻng, Eron agar AQSh Eron-Isroil urushiga qoʻshilgudek boʻlsa, Eron AQShning Yaqin Sharqdagi harbiy bazalariga hujum qilishni aytib harbiy samolyot va qurollarini harakatga keltirgan edi.