Boysunlik ishbilarmonlar togʻ qoʻynida kartoshka yetishtirdi

Surxondaryo viloyatining Boysun davlat oʻrmon xoʻjaligi hududida 366,5 gektar oʻrmon bilan qoplanmagan lalmi yer mavjud. Bu yerlardan unumli foydalanib, oziq-ovqat ekinlari parvarishlash uchun yaqin atrofdagi qishloqlar aholisiga shartnoma asosida taqsimlab berilmoqda.

Masalan, oʻrmon xoʻjaligining Yuqori Machay mahallasidagi togʻlar bagʻridan 7 gektar lalmi yer maydonini Qizilnavr qishlogʻida yashaydigan Mengli Murtazoyev oʻzlashtirib, kartoshka ekdi. Tajribali dehqon togʻlar qoʻynidagi boʻz yerdan moʻl hosil olish uchun uch kilometrdan ortiq masofaga polietilen quvur yotqizib, buloq suvini olib keldi.

Oʻrmon xoʻjaligi yerida dehqonchilik bilan shugʻullanib, sifatli hosil yetishtirishni boshlagan M.Murtazoyev mavjud maydondagi kartoshkadan dastlabki yil 500 million soʻm atrofida daromad olishni moʻljallamoqda.

Bu yil oʻrmon xoʻjaligining Yuqori Machay boʻlimidagi ikki gektar yerda Maftuna Egamberdiyeva, Avlod mahallasidagi boʻsh turgan ikki gektar maydonida Fayzulla Rahmonovlar ham kartoshka parvarishlamoqda.