Ekologik stikerni onlayn tartibda rasmiylashtirish mumkin

Ekologik stikerni olish uchun Yagona interaktiv davlat xizmatlari portali yoki uning mobil ilovasiga kirib, qidiruv satriga “Ekologik stiker” deb yozish yoki “Transport” boʻlimi orqali “Avtotransport vositasiga ekologik stiker olish” xizmatini tanlash kifoya.

Ariza berish jarayonida maʼlumotlar avtomatik ravishda shakllantiriladi. Fuqaro faqat arizani tasdiqlaydi hamda transport vositasi haqidagi maʼlumotlar va ekologik stikerni pochta orqali yetkazib berish manzilini koʻrsatadi. Tizim tomonidan pochta xarajatlari uchun toʻlov invoysi shakllantiriladi va ariza beruvchi belgilangan toʻlovni elektron tarzda amalga oshiradi.

Vakolatli organ transport vositasi maʼlumotlarini axborot tizimlari orqali tekshirib, ekologik toifani avtomatik tarzda aniqlaydi. Shundan soʻng ekologik stiker rasmiylashtirilib, chop etiladi va pochta orqali ariza beruvchiga yuboriladi.

Tayyor stiker 10 kun ichida uyga yetkazib beriladi. Stikerning oʻzi va ariza topshirish bepul, faqat pochta orqali yetkazib berish xizmati uchun 20 600 soʻm toʻlanadi.

Ekologik stiker turlari

Ekologik stiker — transport vositasining ekologik toifasini tasdiqlovchi elektron maʼlumotlarni oʻz ichiga olgan maxsus yorliq hisoblanadi. Stikerlar uch xil rangda boʻladi:

• yashil — “toza” ekologik daraja;
• sariq — “oʻrtacha” ekologik daraja;
• qizil — “zararli” ekologik daraja.

Rangli ekologik stikerlarni Davlat yoʻl harakati xavfsizligi boʻlinmalarida ekologik operatorlar orqali olish ham mumkin.

Qayta rasmiylashtirish va imtiyozlar

Ekologik stikerlar transport vositasi uchun birinchi marta va har yili bir marta bepul beriladi. Quyidagi holatlarda stiker qayta rasmiylashtiriladi:

• transport egasi yoki davlat raqami oʻzgarganda;
• old oyna almashtirilganda;
• stiker shikastlanganda yoki oʻchib ketganda.

Elektromobillar, moped, skuter va mototsikllar uchun ekologik stiker talab etilmaydi. Gibrid transport vositalari ishlab chiqarilganiga uch yilgacha boʻlsa, “toza” toifaga kiritiladi. Ilgari sariq yoki qizil stiker olgan haydovchilar transport vositasining texnik holati yaxshilangandan soʻng stiker rangini oʻzgartirish huquqiga ega.

Avval maʼlum qilganimizdek, ekologik stiker boʻyicha jarimalar 2026 yildan qoʻllanilmaydi. Jarimalarni qoʻllash 2 yildan soʻng boshlanadi. Bu davr mobaynida haydovchilar oʻz avtomobillarining texnik holatini yaxshilash imkoniyatiga ega boʻladi.