O‘zbekiston va AQSh oʻrtasida qancha miqdordagi kelishuv imzolandi

Hujjatlar sanoat, transport, energetika, muhim minerallar, moliya, raqamli texnologiyalar, qishloq xo‘jaligi, sog‘liqni saqlash va ta’lim sohalarini qamrab oladi.

Bu haqda O‘zbekiston Investitsiyalar, sanoat va savdo vazirligi ma’lumot berdi.

Kelishuvlar investitsiya kiritish, texnologiyalar almashinuvi va savdo hamkorligini rivojlantirishni nazarda tutadi.

Moliyaviy hamkorlik doirasida Franklin Templeton, Oppenheimer & Co., Citigroup va BlackRock bilan tuzilgan kelishuvlar O‘zbekiston kompaniyalarining xalqaro kapital bozorlariga chiqishi, institutsional investorlarni jalb qilish va infratuzilma loyihalarini moliyalashtirishga qaratilgan.

Wabtec bilan hamkorlik temiryo‘l texnikasi va ehtiyot qismlari ishlab chiqarishni mahalliylashtirishni ko‘zda tutadi. GE Aerospace esa Uzbekistan Airways aviakompaniyasining yangi samolyotlari uchun dvigatellar yetkazib beradi.

Konchilik sohasida ReElement Technologies, Traxys va Trafigura bilan kelishuvlar tuzilgan. Ular konlarni o‘rganish va o‘zlashtirish, texnologiyalar almashinuvi hamda muhim minerallar toifasiga kiruvchi tabiiy resurslarni yetkazib berish masalalarini qamrab oladi.

Bundan tashqari, Amazon Leo bilan sun’iy yo‘ldosh aloqasini rivojlantirish, GE HealthCare bilan zamonaviy tibbiy texnologiyalarni joriy etish, Valmont Industries bilan esa qishloq xo‘jaligi samaradorligini oshirish bo‘yicha hamkorlik rejalashtirilgan.

19-oktabr kuni Samarqandda Markaziy Osiyo davlatlari va AQSh o‘rtasidagi C5+1 formatidagi muzokaralarning biznes dasturi boshlandi.

Vazirlik ma’lumotlariga ko‘ra, unda 400 dan ortiq kompaniya vakillari qatnashmoqda. Ularning 100 dan ortig‘i AQSh, 100 tasi Markaziy Osiyoning boshqa davlatlari va 200 tasi O‘zbekiston kompaniyalaridir.