Isroil Gʻazoga 153 tonna bomba tashlaganini Netanyahu tan oldi

Netanyahu Knesset (parlament) yigʻilishidagi chiqishi davomida otashkesimga qaramasdan amalga oshirilgan havo zarbalari haqida soʻzlar ekan, nutqi oppozitsiya deputatlari tomonidan bir necha marta boʻlinib, toʻxtab qolgani xabar qilindi.

Uning aytishicha, Isroilni soʻngi hujumlari natijasida Gʻazoning turli hududlarida 44 nafar falastinlik halok boʻlgan.

“Otashkesim HAMASga bizga tahdid qilish huquqini bermaydi. Isroilga har qanday hujum qattiq oqibatlarga olib keladi”, — dedi Netanyahu.

U HAMASni otashkesim shartlarini buzishda ayblab, qoʻshimcha qildi:

“Otashkesim vaqtida ikki nafar askarimiz halok boʻldi. HAMAS bizni bosimni kamaytirdi deb oʻyladi. Biz Gʻazo boʻylab oʻnlab nuqtalarni nishonga oldik va 153 tonna bomba tashladik”.

Isroil armiyasi avvalroq HAMASning Rafah shahridagi goʻyoki hujumiga javoban Gʻazoning bir nechta hududlarini bombalaganini maʼlum qilgan edi.

HAMASning harbiy qanoti esa otashkesim shartlariga qatʼiy rioya qilayotganini va Rafahdagi voqealarga aloqasi yoʻqligini bildirgan.

Falastin manbalari maʼlumotiga koʻra, Rafahdagi toʻqnashuvlar HAMAS jangchilari bilan Isroil qoʻllab-quvvatlab keladigan Yasir Abu Shebab boshchiligidagi qurolli guruh oʻrtasida sodir boʻlgan.

Hujumlardan soʻng Isroil armiyasi Gʻazoda otashkesim rejimi qayta tiklanganini eʼlon qildi.